Көлдөргән дә, бөлдөргән дә...

1. Совет осоро. Ҡайным иртән яңы ғына магазиндан алып ҡайтҡан ҡаймаҡ менән сәй эсеп ултыра. Кухняға ҡатыны инә:
– Ниңә ҡаймаҡ ашайһың? Балаға ҡалдырыр инең.
– Унда тағы ла бар.
– Минең дә ашағым килһә?
– Һыуытҡысты ас, һиңә лә етә.
– Ә минең әсәйем кеше түгелме ни?
Ҡайным ҡатынына текәлә һәм аныҡ итеп:
– Мин бөтәгеҙгә лә алдым, – ти ҙә ашауын дауам итә. Ҡатыны бер аҙҙан:
– Ниңә шул тиклем аҡса тотон­доң? – тип ҡашын емерә.
2. Ҡатнашыусылар шул уҡ.
Ҡайным дуҫына яңы фатирға күсергә ярҙам­лаша. Өсөнсө көн инде арҡаһы ауыртып яфалана. Һыҙланыуға түҙә алмағас, “Звез­да” бәлзәме менән һөртөнмәксе була. Әйтеп үтергә кәрәк, ул осорҙа Вьетнамда сығарылған “Звез­дочка” дарыуханала тулып ятмай, һатыуҙа һирәк күренә. Бөтә ауы­рыуҙарҙы ла дауалаусы һәм үлектәрҙе аяҡҡа баҫ­тырыусы да­рыу тип йөрөтәләр уны. Ҡайным арҡаһына тап бына ошо бәлзәмде һөртә лә инде. Банканы урынына ҡуйғанда бүлмәгә ҡатыны инә. Ят еҫте һиҙеп ҡалғас, ул:
– Һин әллә “Звездочка”ны ҡул­ландыңмы? – тип һорай.
– Эйе, ярамаймы ни? – ти этлек­те һиҙеп ҡалған ҡайным.
– Һин уны һуңғы сиктә, кемдең­дер ҡайһы ерелер ауыртҡанда ғына тотонорға икәнлеген беләһең дә инде!
3. Беҙҙең көндәр. Ҡайнымды аҙыҡ-түлек алырға магазинға ебәрәләр. Ғаиләнең һәр ағзаһы үҙенә кәрәк нәмәне алырға ҡуша: эремсек, сыр һ. б. Ҡатыны иренән иркә тауыш менән һорай:
– Һин үҙеңә нәмә алырға теләр инең?
Ҡайным уйға бата:
– Һунарсылар колбасаһы...
Ҡатыны ҡырт киҫә:
– Юҡ, алмайһың! Уны ашаһам, минең үҙәгем көйә.
И. ҠУРАМШИН.