Ир. Миңә яңы футболка кәрәк!
Ҡатын. Нимәгә? Үткән айҙағы эш хаҡынан ғына алғайным бит...
Ир (ауыҙын бәлшәйтеп). Ул бит үткән айҙа.
Ҡатын. Һуң, был айҙыҡын әле бирмәнеләр.
Ир. Әнә, 42-се фатирҙағы Фәнискә ҡатыны бөгөн ялтыр туп төшөрөлгәнен алып ҡайтҡан! Шуныһын кейеп, диванында бай балаһы кеүек ятып, футбол ҡарай. Ә мин бында... үткән айҙыҡында һаман...
Ҡатын. Ҡәҙерлем, әле беҙ ала алмайбыҙ, үҙең күреп тораһың...
Ир. Күрмәйем дә, белгем дә килмәй. Юҡ, түҙә алмайым мин бындай тормошҡа, атайыма ҡайтып китәм, бөттө!
***
Аш бүлмәһендә ҡатыны, ире, ике улы киске аш алдынан. Ҡатын плитә янында, ир заттары өҫтәл артында.
Ҡатын. Тәүге лот – бишбармаҡ ашы. Башланғыс хаҡы – ҡашығаяҡ йыуыу.
Ир. Үҙемдең генә түгел, һинең дә аш тәрилкәңде йыуам!
Ҡатын. Афарин, атайығыҙ минең дә, үҙенең дә тәрилкәһен йыуа – бер!
Өлкән улдары. Мин ҡустымдың тәрилкәһен, сәй эскән стаканын да йыуам!
Ҡатын. Үәт-үәт, тәрилкә һәм стакандар йыуыу – бер!
Бәләкәй улдары. Сүп-сарҙы сығарам.
Ҡатын. Һай, рәхмәт яуғыры, Сүп-сар сыҡты – бер, ҡашығаяҡтар йыуылды – ике... йә, йә, аш һыуына...
Ир. Айлыҡ эш хаҡын тулыһынса һиңә бирәм!
Ҡатын. Һатылды! Афарин! Тәүге бишбармаҡ көрән күлдәктәге иргә һатылды!!!
Р. ЫРЫҪҠУЖИНА.