Кабинеттан бер ваҡытта ла ҡағыҙ тотмайынса сыҡма. Ҡағыҙ тотҡан кеше мөһим кәңәшмәгә ашығыусы егәрле хеҙмәткәр тойғоһо ҡалдыра. Буш ҡул менән йөрөүсе тураһында ашханаға китеп бара йәки тәмәке көйрәтергә сыҡҡан, тип уйлайҙар. Бынан тыш, өйҙә лә эшләй икән тип әйтһендәр өсөн, эштән киткәндә үҙегеҙ менән мөмкин тиклем күберәк ҡағыҙ алығыҙ.
Компьютер. Көноҙон компьютер алдында ултырһаң, сит кешеләр һине, әһә, был баш күтәрмәй эшләй икән, тигән фекергә килер. Ә һин иһә шәхси почтаңды уҡый, чатта ултыра йәки күңелеңә оҡшаған уйынды уйнай алаһың. Түрәң тотһа ла борсолма, күҙ ҙә йоммай, беҙҙең ойошмаға кәрәкле яңы программа өйрәнәм, тип әйт. Һис шикһеҙ ышаныр.
Өҫтәл. Документтарҙы өҫтәл тултырып таратып һал. Үткән йылғылары ла быйылғылары һымаҡ күренә. Шуны онотма, иң мөһиме – күләм. Уларҙы төрлө өйөмдәр араһына ҡыҫтыр. Берәйһен көтһәң, уға кәрәкле ҡағыҙҙы шул өйөмдәр араһынан ашыҡмайынса ғына эҙләп алып бир.
Автомат яуап биреүсе. Бындай аппаратың булһа, бер ваҡытта ла трубканы алма. Шуны хәтереңдә тот: кешеләр һинең сәләмәтлегең менән ҡыҙыҡһынмай, улар нимәлер эшләтер өсөн шылтырата. Ваҡыт-ваҡыт мәғлүмәттәрҙе тыңла. Әгәр кемдер һине эш менән күмергә йыйына икән, уға тәнәфес ваҡытында шылтыратып (ә ул урынында түгел), хәбәреңде автомат яуап биреүсегә ҡалдыр.
Ҡасан ҡайтырға? Эштән һуңғараҡ китергә тырыш, бигерәк тә түрәң кабинетында ултырһа. Был ваҡытта кроссворд сис, журнал уҡы. Китер алдынан мотлаҡ түрәңдең кабинеты янынан үт, үҙе күрмәһә лә, секретаршаһының күҙенә мотлаҡ салынырһың. Түрәңә эштән һуң (22:10, 7:05), шулай уҡ ял һәм байрам көндәрендә мөһим электрон хәбәрҙәр ебәр.
Һүҙ запасыңды тулыландыр. Яңы компьютер журналдары уҡып, таныш булмаған һүҙҙәрҙе һайлап ал. Уларҙы түрәң менән һөйләшкәндә иркен ҡуллан. Иҫеңдә тот: уға һине аңлау мотлаҡ түгел, әммә тәьҫире иҫ киткес буласаҡ.
Ике пинжәк тот. Запас пинжәгеңде ултырғыстың арҡаһында ҡалдыр. Был һин ҡайҙалыр ошонда йөрөй йәки бер нисә минутҡа ғына сыҡҡан тигән тойғо ҡалдырыр. Икенсе пинжәгеңде урамға йөрөргә сыҡҡанда йәки эш ваҡытында үҙ проблемаларыңды хәл иткәндә кей.
ЮЛАМАН.