Кабинанан егет менән ҡыҙ сыҡты. Дуҫым ҡыҙып-ҡыҙып нимәлер аңлатырға тырыша, ә егет ысын мәғәнәһендә үкереп илай! Бындай хәлде күреп, дуҫым йомшара төштө:
– Йә, ярар, ниңә үкерәһең?.. Барыһы ла тәртиптә. Страховка ҡаплар әле.
Егет һыҡтауҙан туҡтарға уйламай ҙа. Дуҫым:
– Етер инде, “автогражданкаң” барҙыр бит?
– Страховка барлыҡҡа бар ҙа ул, тик унан ни фәтүә!!!
– Бигерәк һәйбәт! Ир була бел, үҙеңде ҡулға ал! Машина һинеке, страховкаң бар, ниңә һыҡтайһың? Үҙ-үҙеңде бөтөрмә. Теләһеңме, хатта гаишниктарҙы ла саҡыртып тормайбыҙ. Тыныс ҡына айырылышайыҡ.
Егет ҡапыл тубыҡланды ла йоҙроҡтары менән асфальтты төйөргә тотондо...
Бөтөнләй ҡаушап ҡалған дуҫым, ни эшләргә лә белмәйенсә, тегенең ҡыҙына боролдо. Уныһы иһә үҙен тыныс тота, әйтерһең, машиналарын бәрҙермәгәндәр.
– Исмаһам, һеҙ әйтеп ҡарағыҙ. Уңайһыҙ ҙа баһа...
– Беләһегеҙме, – тине ҡыҙ, – машина минеке. Беҙ бәхәсләштек, рулгә ултырғас, бер аҙна эсендә кемдеңдер машинаһына бәрелә икән, ул миңә өйләнергә тейеш. Аҙна тамамланырға дүрт көн бар әле...
И. МӘСӘЛИМОВА.