Нисек йәшәгәнбеҙ БИОДРОНһыҙ?

Сәпсим генә лә башһыҙ булған икән тотош халыҡ. Бысағыма кәрәкмәгән тотош медицина, психология, косметология, химия һәм фармацевтика кеүек өлкәләрҙе уйлап сығарып бөткәндәр бит тормошобоҙға биодрон кеүек супер-пупер нәмә, почти тереһыу килерен белмәй. Әткәндәй, әгәр Урал батыр биодрондың булырын белһә, ул тереһыуҙы эҙләп тә ыҙаламаҫ ине. Әллә ниндәй дейеүҙәр, яуыз көстәр менән алышмаҫ та ине. Оҙо-он ғүмер йәшәр ине бит инде. Ииххх!.. Ул заманда биодрон булмаған шул. Шуға ла ҡатын-ҡыҙҙар үҙ аллы, аҡсалы, сауҙалы була алмайса өйҙә генә ултырғандар. Уҡытҡандар шунда мәктәптә, дауаханала табип булғандар, кемдәрелер гәзит яҙған йәки магазинда һатыу иткән, берәүҙәр балалар баҡсаһында эшләгән булғандыр инде. Ә бына биодрон килгәндән алып бөтөн был кәрәкһеҙ хеҙмәттәр икенсе-өсөнсө планға күсеп, беренсе рәткә шул мөғжзәле биодрон торҙо. Иртән уян да биодрон эс – вис тормошоң яйлана, төш ултыр ҙа биодрон аша – һыпа-һылыу була ла ҡуяһың, кис шул биодрон эсенә инеп ят – бөтөн ауырыуҙарың һыпырылып төшә. Икмәк һалма, ҡорот ҡайнатма, аш бешермә бынан ары, хатта магазинға ла йөрөмә аҙыҡ артынан – биодрон бар бит. Ә инде һин берәйһенең командаһына теркәлеп, биодронды һата башлаһаң – у-уййй – әйтеүе лә ҡурҡыныс (шуға шыбырлап ҡына әйтәм) – байыйһы-ыыың. Ысссын! Бынан алып бәпесеңә имсәк бирмә, биодрон имеҙ – тиҙ үҫер, уҡыусы балаңа биодрон эсер – отличник булыр, иреңә әвиткә биодрон һалып бир – туҡ йөрөр, ҡәйнәңә биодрон ҡой – үлмәй ыҙалатыр...

Что то мин бында һеҙҙең менән оҙаҡ ләпелдәп ташланым, ахыры, тағы бер ҡатындың биодрон эсеп күрһәткәнен ҡарамай үткәреп ебәрәм бит хәҙер. Ә инде һеҙ биодронды ҡабул итмәйһегеҙ, рекламаларын ҡарамайһығыҙ һәм (боже упаси!) биодрондың нимә икәнен белмәйһегеҙ икән – һеҙ – отстой!