Белла Ахмадуллина, Зөһрә Ҡотлогилдина кеүек шағирәләрҙе беләбеҙ, ә быны тәүгә күреүебеҙсе! Нишләп бығаса арабыҙҙа шундай талант йөрөгәнен белмәгәнбеҙ ҙә, күрмәгәнбеҙ ҙә? Үҙебеҙ бер туҡтауһыҙ әҙәбиәт тураһында сурытҡан булабыҙ бит әле килештереп. Оят булып китте, ижад өлкәһендә үтә лә һай йөҙөүебеҙ өсөн ғәрлек ине беҙгә. Ул арала шағирә ханым нилектән килеп сығыуын тәҡрарланы.
– Быға тиклем заводта эшләгәйнем. Быйыл пинсегә сыҡҡас, ваҡыт үткәрә алмай хыялыйҙар була яҙҙым. Төнө буйы керпек тә ҡаға алмайымсы бына, йоҡо дарыуы ла эсеп ҡарайым, файҙаһы юҡ инде, юҡ. Шағирҙарға, теге ни, нимә тип атала әле, – ҡатын нимәнелер иҫенә төшөрөргә тырышып, йыуан бармаҡтарын баш осонда бейетте, ә-ә-ә, илһам, илһам, бына шул нәмәҫтәкәй төндә килә тип ишеткәнем бар ине. Мәйтәм, нишләп алтын кеүек ваҡытты биздилаға үткәрәм әле. Күҙҙе упайтып бушҡа өйәҙәп ятҡансы тип, шиғыр яҙа башлағайным, килде лә сыҡты. Хәҙер шишмә кеүек урғылып тора бына, яҙып ҡына өлгөр. Пустуй ғына эш икән ул.
Ҡатын шулай тине лә китап кеүек ҡалын дәфтәрен Сәлимгә килтереп һондо. Унан йәнә лә тытылдығын сыҡты.
– Хәҙер мине күрше-тирәләр, туған-тыумасалар үҙебеҙҙең шағирә тип кенә тора. Ҡайҙа бармайым, иң тәүҙә миңә ололоҡлап һүҙ бирәләр. Данлыҡлы кеше булыу яман эрәхәт икән ул. Береһе, туғанымдың тыуған көнөнә шиғыр ғына яҙып бирсе әле тип килә, унан – икенсеһе.
Яңы асылған талант эйәһенең ижад емештәре үтә “татлы”нан булды ахырыһы, уны тәмләгән һайын бығаса кәйефле генә ултырған Сәлимдең йөҙө сирыла барҙы. Ә шағирә сурытыпмы сурытты:
– Нишләп шуны электән яҙмағанмын икән, заводта эт урынына һөйрәлгәнсе. Шиғырҙы мөгөҙлө кешеләр уйлап сығаралыр шул. Хикәйә менән ыуаҡланып торманым инде. Китабы сыҡһа, шиғырҙың аҡсаһы ла шәберәк була, тиҙәр...
Шағирәнең бөтә ауылдың фотоларын йыйған альбом кеүек ҡалын дәфтәренән айырыла алмай ултырған Сәлим күҙҙәрен берсә аҡайтып, берсә йомоп-йомоп ала. Уның бындай реакцияһына түҙмәй мин дә урынымдан тороп, көтмәгәндә балҡып килеп ингән халыҡ шағирәһенең дәфтәренә текәлдем. Уҡый башлаған шиғырымдың тәүге юлы – Зөһрә Ҡотлогилдинаныҡы, аҙаҡҡы ике юлы өсөнсө көн элек кенә гәзитебеҙҙә сыҡҡан Рәзилә Ырыҫҡужинаның шиғырынан ине...