– Бер байрамда ла ял иткәнем юҡ, – тип аптыратты был гаишник мине. – Һуң, миңә бит йорттоң икенсе ҡатын төҙөп бөтөргә кәрәк, өсөнсө фатирға ипотека ла түләп бөтөлмәгән – үҙең белмәгән ни эш бар! Һуңынан уларҙың барыһын һатып, йылы яҡҡа күсеп китергә, диңгеҙ буйында йыл әйләнәһенә ҡыҙынып ятырға була. Беләһеңме тағы нимә? Бер көн өйҙә торһам, эстән ҡорт кимерә башлай: аҡса ситкә китә, сыҡ юлға, тигән кеүек тауыштар ишетә башлайым.
– Байрамда табыш арыу төшәме һуң?
– Ниндәй табыш? – Күршемдең күҙе шарҙай булды. – Һин мине кеше талап аҡса эшләй тип уйлайһыңмы әллә? Байрамда юлға сыҡҡан өсөн икеләтә эш хаҡы түләйҙәр бит. ГАИ хеҙмәткәрҙәренән дә намыҫлы кеше юҡ, белгең килһә. Һеҙҙең журналист халҡы берҙе биш итеп яҙырға әҙер.
Миңә оят булып китте. Намыҫлы кешене һис тә юҡҡа рәнйетә яҙҙым. Ә-һә, урам ситендәге бынау өс ҡатлы йорт хакимиәт белгесенеке. Бына ул, исмаһам, йәшәй белә. Ҡатынының унлап магазины бар, дәүләттән гел ярҙам ала, бер туҡтауһыҙ гранттар ота, тиҙәр. Моғайын, байрамда матур итеп ял итәлер, бер юлы бай кешенең хыялын да белге килә.
– Йөк аты байрамда ял итмәй ул, ҡустым! – тип ҡуйҙы дәүләт хеҙмәткәре. – Ҡытайҙарҙы көтәбеҙ, эргәләге баҫыуҙы ҡуртымға алып, йәшелсә үҫтермәкселәр.
– Ҡытайҙар химикат менән ерҙе боҙа, тиҙәр бит!
– Инвестор улар, ҡустым, хәтереңдә тот! Ил сәйәсәтенә ҡаршы булма!
– Э-э, байрам уңайынан уй-хыялдарығыҙ менән уртаҡлашығыҙ әле?
– Улым Ҡытай компанияһына эшкә урынлашып, Шанхайҙа йәшәй, шунда тамыр йәйһен, һеңлеһен дә үҙ янына алһын, тим. Һуңынан беҙ ҙә, бәлки, шул яҡҡа ҡуҙғалырбыҙ. Беҙҙә бит экология насар, ашағаныбыҙ шыр химия.
Өйгә ҡайтҡас, телевизорҙан бер министр урынба- ҫарының миллиардлап урлашҡаны, сит илдәрҙәге зиннәтле йорттары хаҡында репортаж тыңланым. Баҡһаң, ул да биш йыл отпускы алмайынса эшләгән икән. Ә минең репортаж килеп сыҡманы, бер хыял ғына тыуҙы. Бурҙарҙы, вазифаһын кеҫә ҡалынайтыу өсөн генә файҙаланған йылғыр әҙәмдәрҙең барыһын да йә йылы яҡтарға, йә Ҡытай-фәләнгә оҙатып, үҙебеҙ генә йәшәһәк, байрамыбыҙ-байрам, ялыбыҙ-ял булмаҫ инеме икән?!
Марат ҺАБАЕВ.