Яңы аппарат

Ауылдарҙа йәшәгәндәр шунда уҡ та­бип­­тарға сиратҡа яҙылды. Мөмкин­лек бар саҡта, яңы аппарат боҙолмаҫтан алда барып күренә һалып, бик булмаһа заман технологияһын күҙләп булһа ла килергә кәрәк.
Дауахананың үҙендә лә хеҙмәт­кәр­ҙәр гөж килде. Төпкөл райондың бални­сына көн дә улай иғтибар бү­л­­мәй­­ҙәр! Өп-өр яңы аппаратты килте­реү­ҙәрен унда ла түҙемһеҙләнеп кө­­­тә­ләр. Хатта баш ҡаланан ҡулланыр­ға өйрәтәсәк белгес тә ебәрә тип һөйләнеләр...
Аппаратты алып килгән көн ҙур байрамға әүрелде. Дауахана шарҙар­ға, гөл-сәскәләргә күмелде. Чиновниктар килде, журналистар йыйылды, хеҙмәт ветерандары саҡырылды. Бар халыҡ яңы, замандың барлыҡ технологияларына ярашлы, зауыҡ­лы һәм уңайлы итеп эшләнгән аппараттан күҙен алманы. Уны хат­та ҡыҙыл таҫма бәй­ләп тороп асырға ла онотманылар. Әл­бит­тә таҫманы ҡырҡыу хоҡуғы бында килгән иң юғары вазифа­лы­ларға тапшырылды. Иҫ киткес матур байрам булып үтте ул тарихи көн!
Бына ултыра ул аппарат хәҙер райондың йәме булып! Ялтырып, күҙ яуын алып! Төпкөлдәге дауаханалар ҙа онотолмаған икәнде аңлатҡан, медицина өлкәһе көндән көн үҫешә барыу билдәһе, яҡты киләсәк өмөтө – яңы ғына, арыу ғына, ныҡ кәрәкле бахилалар аппараты!

Айгөл СӘЛӘХОВА.

Фото: tourist-car.ru