Уҡымышлы айыу

Бер ай дауаханала ятып ауылға ҡайтып төшкән Хәбибте танырлыҡ та түгел ине. Башы аша машина үтеп киткәнме ни: тырналған, теш­ләнгән урындары һаман уңал­ма­ған, танау ҡый­шай­ған, йөҙ са­лы­шай­ған, тигән­дәй. Ярай әле, кәүҙә­һенең ни рә­үеш­ле икәнен берәү ҙә күр­мәй.
...Хәбиб страховкалау ойош­­­ма­һы тупһаһын ашаҡ­лап үткәс, сираттағы бар халыҡ уға төбәлде. Коридорҙа йүгереп йө­рөгән биш йәштәрҙәге бала ҡур­ҡыуынан ҡыс­ҡырып илап ебәрҙе. Бер ханымдың ҡуйынын­дағы уйын­сыҡтай эт шыңшырға тотондо.
– Һаулығығыҙға зыян килгән өсөн страховка аҡсаһын түләй алмайбыҙ, – тип белдерҙе оло йәштәге белгес, Хәбиб килтергән медицина справ­каһын, документтарҙы ентекләп өйрәнгәндән һуң.
– Нишләп түләмәйһегеҙ? – ирҙең былай ҙа ҡурҡыныс йөҙө бөтөнләй ҡарағыһыҙ булды. – Үҙегеҙ көсләп страховка ки­ле­ше­үе төҙөнөгөҙ, ай һа­йын арыу ғына аҡ­саны һыҙырып алып ҡалаһығыҙ, һаулығыма зыян килдеме – килде, айыу үлтерә яҙҙы мине, ауыртмаған ерем юҡ, хәҙер эшләй ҙә алмайым.
– Шулайын шулайҙыр ҙа, – белгес әңгәмәсеһенең ҡарашын күтәрә алмай алдындағы ҡағыҙҙарына тө­бәлде. – Бына инструкцияла яра эҙе кәмендә биш сантиметр булырға тейеш тип яҙылған, ә һеҙҙеке дүрт сантиметр ғына – дауахана биргән белешмәлә шундай һандар бит. Ин­струкцияға ярашлы рәүештә берәй ағзағыҙ эштән сығырға тейеш. Әй­тәйек, күҙегеҙ сыҡһа, айыу ҡола­ғығыҙҙы йәки тана­уы­ғыҙҙы өҙөп ал­һа, аҡсаны ҡыуанып түләр инек. Та­на­уығыҙҙы һындыра һуҡҡан, әл­бит­тә, был ғына етмәй шул...
– Йә, Хоҙай, – Хәбиб апты­рауҙан әйтер һүҙен әйтә алмай торҙо. – Тимәк, айыу ми­не һеҙҙең ин­струк­­цияға ҡарап туҡ­марға тейеш булған?
Килеүе бушҡа ғына булды тәнендә имен ере күренмәгән ирҙең. Ойош­ма етәксе­һенә инеү ҙә, дауахананың баш табибына, һуңынан прокура­тураға барыу ҙа һөҙөмтә бирмәне. Барыһы ла закон һағында ныҡ торалар икән – “ярамай”ҙан башҡа һүҙҙе белмәйҙәр. Аптырағас, аҡыллы ке­ше­ләр­ҙең кәңәшен тыңлап, байтаҡ аҡса сығарып, юристарға консуль­тацияға йөрөп алды, шәхси клиниканан тейешле справкалар юлланы Хәбиб.
– Тулы күләмдә страховка аҡса­һын түләрбеҙ, – тип ҡуйҙы шул уҡ ойошмалағы шул уҡ белгес, Хәбиб­тең документтарын ентекләп өйрән­гәс, шунан ситкә ҡарап шым ғына өҫ­тәп ҡуйҙы. – Был айыуҙың алдын­да беҙҙең инструкция ятҡан, тиер­һең, шуның буйынса ғына туҡмаған быны, бер ҙә ситкә тайпылмаған!

Марат ӘМИНЕВ.