Кисә үлгән булһам...

«Евро» тип атал­ған ремонт яһағандар. Бер ҙә ҡала мәктәбенән кәм түгел. Тырышып уҡы ла уҡы.
Тәнәфес ваҡытына тура килде. Уҡытыусылар бүлмәһенә ҡарай атланы. Һаулыҡ һораш­ҡас, уҡытыусыларҙы байҡаны, ләкин таныштарын күрмәне. Йәштәр. Уларҙан хәлен һо­рашты, уҡыусыларҙың уҡыуын белеште. Ҡайҙа ла балалар балалар булып ҡала инде, шаяндар, ләкин уҡыйбыҙ, тип тырышып торалар.
– Беҙ ҙә бала саҡта шаян бул­дыҡ, – тине Мәхмүт. Әллә ҡа­сан ауылдан күсеп киткән дуҫының улы ошо мәктәптә эшләүен иҫкә төшөрҙө. – Физиканан уҡыта, исеме Марат булһа кәрәк, ҡайҙа икән?
– Ул «отработка» тип аталған ваҡыты бөткәс, бизнесҡа китте,– тине үҙен Әнисә тип та­ныт­ҡан уҡытыусы. – Үҙеңдең эшеңде асыр өсөн отработка эшләргә кәрәк. Бына мин дә отработка ваҡыты үтеүен көтөп уҡытып йөрөйөм. Бизнесҡа ки­тәсәкмен. Йәштәр бөтәһе лә шулай итә. Закон шулай ҡуша. Кем бизнеста янып, банкротҡа төшөп, кире уҡытырға килә. Бизнесҡа барырға теләмәгән уҡытыусыларҙы, ниңәлер, «призвание» тип атайҙар. Әй­терһең, уҡытыусы һөнәре юҡ.
Тайгала урман ҡырҡып ятып, донъянан артта ҡалынған икән.
Өләсәйем әйтмешләй, кисә үлгән булһам, бөгөн белмәҫ инем быны.

Сәлих ВАҺАПОВ.