Һатыу нөктәләренең исеме есеменә тап килеп тора. Унда хаҡтар арзан булыуына бер көлһәң, һайлаған әйбереңде алғас: «Оттом!» – тип, тағы йылмайып-көлөп сығып китәһең.
Мәрәкә хәлгә тарығансыға тиклем, Әнисә еңгәй ҙә шундай яҡты уйҙа ине. Теге көндө уның «Көлкөлө хаҡтар» магазинына һуңғы тапҡыр инеүе булды. Унда сираттағы юлланыуына ҡоҙағыйының тыуған көнөнә саҡырыуы сәбәпсе ине.
Еңгәйем бүләкте оҙаҡ һайланы. Ниһайәт, күгәрсен тәпәйеләй ҡып-ҡыҙыл ҡатын-ҡыҙҙар салбарына туҡталды. Ҡоҙағыйының салбар кейергә яратыуы сер түгел. Хаҡы ла кеҫәгә һуҡмай, бүләк тә күҙ яуын алырлыҡ, тигән уйҙар менән йылмая-көлә сығып китте магазиндан. Өйөнә инеп биҙәнде лә, ҡоҙағыйының ҡала ситендәге дачаһына ашыҡты.
Мәжлесте башларға уны ғына көтөп торғандар икән. Тышта табын өҫтәле әҙерләгәндәр. Әнисә еңгәйгә иң түрҙән урын бирелде.
Ашап-эсеп алғас, һәр кем бөгөнгө мәжлестең сәбәпсеһен тыуған көнө менән ҡотлап телмәр тотто, бүләген тапшырҙы. Артабан уйын-көлкө, йыр-моң ҡыҙғандан-ҡыҙа барҙы. Бала-саға, тамағын туйҙырып, иркен ихатала туп менән уйнарға төшөп китте.
Ҡыҙмасалап алған Әнисә еңгәй теге ҡыҙыл салбарҙы ҡоҙағыйына кейҙереп ҡарау теләге менән янды.
– Йә инде, ҡоҙағый, булмаһа кейеп күрһәт. Яраймы, килешәме – күрәйек, – тип ҡыҫтаны тыпылдатып бейеп йөрөгән арала.
Әллә Әнисә еңгәйҙең һүҙен йыҡмаҫ өсөн, әллә үҙ теләге менән, ҡоҙағый өйгә инеп бүләкте кейеп сыҡты. Салбар кәүҙәһенә инеп кенә ултырған. Оҙонлоғо ла, киңлеге лә тап-таман.
– Килешә!
– Үҙеңдеке генә!
– Үәт, ҡоҙағыйың һине хөрмәт итә! – тиеште ҡунаҡтар «мәж» килеп.
Маҡталыуҙан башы әйләнгән юбиляр йәнә тыпылдатып бейергә төшөп китте. Бер килке аяҡ аҫтында буталып тәгәрәп йөрөгән тупты бар көсөнә тибеп осорҙо. Салбарының төбө буйынан-буйына һүтелеп сыҡты. Бала-саға унан бер мәрәкә табып, үләндә тәгәрәп ятып көлөргә кереште, ҡайһы бер ҡатындар ирҙәренең күҙҙәрен устары менән ҡапланы, әҙәплерәктәре үҙҙәре ҡараштарын ситкә күсерҙе. Кемгә көлкө, кемгә ҡыҙыҡ. Юбилярыбыҙ өйгә ҡабат атылып инеп китмәһенме.
Ошо хәлдән һуң Әнисә еңгәйем «Көлкөлө хаҡтар» магазинының тупһаһын урап үтер булып китте. Миңә лә башҡаса унда инеп йөрөмәҫкә кәңәш итте. Ана шул саҡта ғына ул магазин атамаһының мәғәнәһен аңланы шикелле.
Һеҙгә бүләк бирә ҡалһалар, абайыраҡ булығыҙ. Уның «Көлкөлө хаҡтар» магазинынан һатып алыныуы бик тә ихтимал.
Ринат СӨЛӘЙМӘНОВ.