– Балыҡтың уң яҡ күршеһе. Кисә Ҡуян менән икәүләшеп машинаны Өфөнөң үҙенән барып алып ҡайтҡандар.
– Яҡшы булған, ҡыуанысын күрһен. Балығы Мөхәррәм инде, Ҡуяны кем тағы?
– Үәт диуана икәнһең, шуны ла белмәгәс, һуң Оҙон Әхмәт малайы ла инде!
– Суртанды әйтәм, ҡайҙан ул тиклем аҡса таба алды икән «Хёндай» алырлыҡ, ҡиммәт машина ла баһа?..
– Себерҙә сит ил компанияһында нефтяник, ти. Правда, етмәгәнен кешеләрҙән үтескә йыйған: Пистолет 50 мең һум самаһы сығарып һалған, Жириновский 30 мең тирәһе биргән, ти.
– Жириновский тигәнең кем?
– Ну һине! Кем булһын, Сулаҡ Хәтмүш малайы, йорто Будулайға ҡаршы ғына. Көлгәндә лә аҡырып, һүгенеп көлә. Өс көн элек кенә Шкатулканың әпәй шүрлеген емереп төшкән.
– Дә-ә. Ауылда көн күргәс ни, һәр кемдең үҙ ҡушаматы бар тиген, ә?..
– Һинеке лә бар ул, күрше.
– Үҙемдекен беләм: Комбат тиҙәр. Колхозда бригадир сағымда таҡҡайнылар.
– Ул бит элек – сәүит заманында ине. Колхоз бөткәнгә биш былтыр бит инде. Шуға күрә заман үҙгәреү менән ҡушаматың да үҙгәрҙе.
– Булмаҫ та! Сер булмаһа, йәле әйт, кем тип йөрөтәһегеҙ?
– Ғәйепләмә, әйтмәйем, һинең алда нисектер неудобно әйтергә. Лутшы сер булып ҡалһын.
– Ярай улайһа: Комбаттан ҡайтышмы, әллә һәйбәтерәкме?
– Нисек тип кенә яуаплайым икән… Ну, айырма бар инде барлыҡҡа…
– Әһә, тә-әк. Самалайым шикелле. Минең бит тамаҡ төбөн «сылатып» алһам, күп һөйләшә торған ғәҙәтем бар. Тимәк, йә Бытбылдыҡ, йә Радио, дөрөҫ әйттемме?
– Ю-уҡ, сәпсим улай түгел.
– Улай түгел икән, бер генә версия ҡала – Ковбой.
– Ни өсөн?
– Һуң, уҙған йыл, күреп беләһең, ат менән көтөү көткәндә йығылып ҡабырғаны һындырғайным. Дауаханала ятып сыҡтым.
– Шәп ҡушамат, әлбиттә. Тик һин уйлағанға тура килмәй. Тағы ла берҙе әйтеп ҡара ла, дөрөҫкә тап килмәһә, серҙе сисермен.
Әнәс, фуражкаһын алға шыуҙырып, бер аҙ уйланғандай елкәһен тырнап торҙо:
– Нүжәли Оҫта? – тине ул, ауыҙын йырып. – Был ҡушамат тап минеке. Ултырғыстар яһап һатам да баһа. Үәт шәп ҡушамат таҡҡанһығыҙ. Бындай маҡтаулы исем арҡаһында даным биш диңгеҙ артына тиклем тараласаҡ. Дан таралғас, ултырғыстарымды һатып алыусылар ҙа бермә-бер артасаҡ. Һатып алыусыға ҡарап тауар етештереү ҙә үҫәсәк. Ә ниңә үҫмәһен?! Урман эргәлә генә, ағастар өҫкә ишелергә тора. Эш урындарын арттырырға тура киләсәк. Һиңә лә, күрше, артелемдә урын табылыр. Сауҙа үҫкәс, билдәле, аҡса өҫкә ямғырҙай яуасаҡ. Суртан «Хёндай» алған, тинең, ә мин текә «Мерседес»та елдерермен. Кирбестән ике-өс ҡатлы йорт һалырмын. Был тиклем дә күп байлыҡ менән капиталисҡа әүереләм бит инде. Капиталист булғас ни, йыуан сигара көйрәтеп, һинең көтөү ҡыуғанды балкондан ҡарап ҡына ултырырмын.
– Бәй, малдарыңды ҡыумайынса, аҙбарҙа ятҡырырға уйлайһыңмы ни?!
– Таптың һүҙ. Ялсыларым ҡыуасаҡ! Зифа буйлы, нәҙек билле һылыу бер ашнаҡсы ла алып ебәрермен әле ҡатынға ярҙамға, аш-һыу әҙерләшергә… Һиңә лә, күршем, файҙам тейер. Мин түләгән мул хеҙмәт хаҡына һис юғы «Ока» алып ебәрерһең. Юҡһа, Сыңғыҙхан заманынан ҡалған кәзә … «Минск» матайында ыштан туҙҙыраһың даһа.
– Уй-хыялдарың иҫ китмәле, – тине Нәғим, күҙҙәрен селт-селт ҡыҫҡылап. – Әммә, ни хәл итәйем, үкенескә ҡаршы, ҡушаматың Оҫта түгел.
– Башҡа ҡушамат тағылмай миңә! Йә, әйт, йәнде ҡыйма, ул саҡта кем мин?
– Тағылмаһа ла, таҡҡандар инде – Фан-та-зёр! Үҙем уйлап сығарманым, халыҡ шулай ти.
– Фантазёр?! Ни өсөн? Әх, дә-ә… Насамдиле, эләктерә беләләр бит нимә ҡушырға. Үәт шилмалар…