– Һуң, Ғәҙел Ғәбитович, яҙабыҙ бит инде... Тағы нимә? – Сөнғәтов тилмереүле ҡарашын хужаһының асыулы йөҙөнә йүнәлтте. – Бюджетын да, бюджеттан тыш юҡ-барын да, өҫтәмәләрен дә, ташламаларын да...
– Төкөрҙө беҙҙең гәзит уҡыусыбыҙ һинең мифик өҫтәмәләреңә, ташламаларыңа. Берәүҙәре өҫтәп өлгөргәнсе, икенселәре биш тапҡыр арттырып өҫтәп ҡуя. Уҡыусыны бөгөн реаль тормош, ысын хаҡтар ҡыҙыҡһындыра. Ана, бәрәңгегә ни хаҡ та, иткә ни хаҡ. Балаһына мәктәп формаһы алыу күпмегә төшә лә, дәреслектәр – күпмегә? – Ғәҙелшин тәҙрәнән ҡала ығы-зығыһына күҙ ташланы. – Күрмәйһеңме ни, тормош ҡайнай. Ә беҙҙең гәзит унан ситтә. Бына шул ябай халыҡ тормошоноң барлыҡ ваҡлыҡтарын асып һалырға кәрәк. Факттар менән генә сикләнергә ярамай, анализ яһарға, күҙаллау самаларға...
Битәр Сөнғәтовтың сәменә тейҙе. Ул йүгереп баҙарға сыҡты. Унда, ысынлап та, тормош ҡайнай ине. Берәү һата, берәү ала, берәү ота, берәү отола. Хаҡтар иҫ китерлек. Үҙебеҙҙә үҫкән помидор йөҙ тәңкә, ә ҡыяры – туҡһан. Африканан килтерелгән банан нишләптер ҡырҡ ҡына. Ә ит инде!.. Алырҙый булһаң, ал, алмаһаң – телеңде шартлатып еҫкәп кенә йөрө. Алыпһатарҙар ыржайып көлә, ябай әҙәмдәр мыйығын бора... Сусҡа – ике йөҙ, башмаҡ – өс йөҙ, йылҡы – өс йөҙ илле, һарыҡ ите – өс йөҙ етмеш, ә инде иҙән аҫты һандуғасы ҡомаҡтың бер туғаны кроликка ымһынһаң, ояттары ла юҡ, биш йөҙ, тиҙәр. Диетическое мясо, имеш! Ашап ябыҡмаһаң, шул хаҡына ғәжәпләнеп ябығырһың, билләһи. Ә балы! Ҡала гәзите хәбәрсеһенең эш хаҡы менән яҡын барырлыҡ та түгел, өс литрлы банкаһы мең ярым. Әйтерһең, уны бушлай осоп йөрөгән бал ҡорттары йыймаған, хужаһы, сәскәнән сәскәгә ҡунып, үҙе йыйған да, үҙе ташыған.
Шулай яҙҙы ла Сөнғәтов. Һәр кәрәк-яраҡтың, аҙыҡ-түлектең хаҡтарын һанап сығыу менән генә сикләнмәне, ул хаҡтарға ҡарата үҙ ҡарашын да белдерҙе. Хатта яҡындағы ярты йылға күҙаллау яһарға ла онотманы: “Эштәр былай барһа, энергоносителдәргә хаҡтар әленән-әле артып торһа, – тип тамамланы ул мәҡәләһен, – оҙаҡламай баҙарҙа иттең хаҡы өс йөҙ илле һумға күтәрелеүе ихтимал”.
Эшҡыуар Харамшин иртәнге сәйгә ултырғанда, Америка бизнесмендарына оҡшатып, гәзит тотоп ултырырға ярата. Гәзите инде уның былай ғына. Бына хәҙер тиҙ-тиҙ генә сәйен һемерер, бисәһен кисәге һыйыр түшкәһе менән ит рәтенә урынлаштырыр ҙа ауылдарға ит йыйырға сығып китер. Алданғанын – алдар, алданмағанына – яныр. Кискә табан “Газель” тултырып арзан ит тейәп ҡайтыр. Татлы уйына мауығып гәзиткә иғтибарын йүнәлтмәгән дә баһа. Йүнәлтте һәм: “Бисәкәй! – тип ҡысҡырып ебәрҙе. – Бында ит хаҡын өс йөҙ иллегә күтәргәндәр, ә беҙ, һинең менән мин, һантыйҙар, өс йөҙгә һатып ятабыҙ!..”
Ҡала гәзитенең иҡтисад бүлеге хәбәрсеһе Сөнғәтов бөгөн иртән баҙарға ит алырға сыҡты. Шәмбе көн бажалары ҡунаҡҡа килергә вәғәҙә иткәйне. Ит алманы, әммә ғорурланып ҡайтты. Яҡшы журналист ҡына түгел шул ул, бына тигән аналитик та, күҙаллау яһаусы ла! Өс йөҙ илле самаһы булыр тигәйне, өҫтөнә баҫҡан булып сыҡты. Бына хәҙер бәйләнеп ҡараһын теге аждаһа!