Белем байрамы күңелле башланды. Уҡытыусыларҙы бүләктәргә, сәскәләргә күмде балалар. Уларға арнап шиғырҙар һөйләнеләр, йырҙар йырланылар.
Унан һуң барыбыҙ ҙа класҡа инеп ултырҙыҡ. Уҡытыусы журналына һәр баланың исем-шәрифен, тыуған көнөн теркәп ҡуйҙы. Үҙенекен дә яҙҙырырға онотманы. Ахырҙа бүләк биреү тураһында тәфсирләп тәҡрарланы.
– Бүләк – әҙәплелек, мәҙәнилек билдәһе. Ул кешене ихтирам итеү, тигән һүҙ. Уны һайлау бик ауыр мәсьәлә. Бүләк алыуға бөтә күңелеңде, оҫталығыңды, тапҡырлығыңды, һәләтеңде егергә кәрәк. Ул кешегә ҡыуаныс, шатлыҡ килтерергә тейеш. Шуға ла нимә етте шуны бүләк итеү – төптө килешмәгән эш. Мәҫәлән, әхирәтегеҙгә нимә кәрәклеген үҙенә һиҙҙермәй генә берәйһенән һорашырға мөмкин.
Уҡыуҙар башланып күп тә үтмәне, уҡытыусылар байрамы яҡынлашты. Был көндө уларҙан бигерәк беҙ, ата-әсәләр, тулҡынланып көттөк. Тик нимә бүләк итергә? Тота килеп үҙенән һорауы уңайһыҙ. Шуға ла барыбыҙға махсус эш йөкмәтелде.
Баҡһаң, уҡытыусыбыҙҙың өйө гәлсәр вазалар, затлы һауыт-һабалар менән тулған. Тик бына шуларҙы матур итеп теҙеп ҡуйыу өсөн стенкаһы ғына юҡ икән. Беҙгә ни, оҙаҡ уйлап тораһы юҡ. Сауҙа үҙәгенән иң затлыһын һайлап, өйөнә алып барып, үҙебеҙ үк йыйып бирҙек. Яңы йыл, 8 март, май байрамдарын да онотманыҡ.
Ниһайәт, беренсе класты ла тамамланыҡ. Йыл буйы балаларыбыҙҙың күҙен асҡан иң изге кешебеҙҙе тағы ла нисегерк һөйөндөрөргә? Шәл мәл уның кемгәлер бер тапҡыр ҙа йылы яҡта булмауы тураһында һөйләгәне иҫебеҙҙгә төштө.
Әһә, таптыҡ әмәлен! Хәҙер беҙ тәү килгәндәге кеүек шыр наҙан түгел. Нимә, нимә, сюрприз эшләй беләбеҙ. Муйындан бурысҡа батһаҡ баттыҡ, уҡытыусыбыҙға төшөнә лә инмәгән бүләк әҙерләнек – диңгеҙ буйына путевка алып бирҙек. Әйҙә, рәхәтләнеп ял итеп, ҡояшта ҡыҙынып, көс йыйып ҡайтһын. Ул бит беҙҙең балаларыбыҙҙың икенсе әсәһе.
Ә үҙебеҙҙә ял ҡайғыһы юҡ. Йән-фарман яңы уҡыу йылына әҙерләнәбеҙ. Көнө етһә, табып булмай торған, тип аҡса йыябыҙ. Яңы уҡыу йылында уҡытыусыбыҙҙы тағы ҡайһылайыраҡ шатландырырға, тип баш ватабыҙ. Бүләк һайлауҙан да ауырыраҡ мәсьәлә юҡ икән шул. Уҡытыусыбыҙҙың тәүге дәрестә биргән һабағын мыйығыбыҙға урап ҡуйҙыҡ.
В. ИСХАҠОВ.