Күҙ алдына килтерәһегеҙме, түләүһеҙ уҡырға, түләүһеҙ дауаланырға мәжбүр иттеләр! Әҙәм аҡтыҡтары! Түләүле отпускыға ебәрҙеләр! Ә һигеҙ сәғәтлек эш көнө, был бит ҡырағайлыҡ! Пенсияға сығыу менән лайыҡлы тормош, ейән-ейәнсәрҙе уҙындырырға мөмкин. Шуға барып еттеләр, эш көнөн 5 – 6 сәғәткә ҡалдырырға маташтылар. Пенсияға ҡатын-ҡыҙҙарҙы 45 йәштән, ир-аттарҙы 50-нән ҡыумаҡсы булдылар! Йыртҡыстар! Ярай әле, өлгөрмәнеләр!
Ә профкомда ташламалы һәм түләүһеҙ путевкаларҙы алырға нисек өгөтләнеләр. Был әтрәгәләмдәр беҙҙе тағы ла спорт менән шөғөлләнергә мәжбүр итте, туристик походтар һәм ГТО менән интектерҙеләр! Ихаталарҙа хоккей майҙансыҡтары һалдырҙылар, йәштәргә кистәрен сәкән һуғыуҙан башҡа эш тә ҡалманы!
Коммунистар кешеләрҙе мыҫҡыл итте! Бушҡа фатир өләштеләр, ләкин стеналарҙағы обойҙарҙың төҫөн бер кем дә яратманы. Аҡтарып, үҙебеҙгә йәбештерергә тура килде. Барыһы ла кешегә ҡаршы йүнәлтелгәйне. Әлеге кеүек түгел инде… Аллаһыға шөкөр, обой йәбештереүҙән ҡотолдоҡ!
Коммуняктарҙың битһеҙ булыуы ғына етмәгән, өҫтәүенә, ваҡсыл да инеләр. Студент билеты менән самолетта Мәскәүгә осҡанымды хәтерләйем. Ни бары 10 һумға!
Улар үҙҙәренең ҡоротҡослоҡ эшмәкәрлеген бик аҫтыртын алып барҙы. Паспортһыҙ илдең икенсе башына китәһең, берәй милиционер бәйләнһәсе! Бер кем дә документ таптырманы! Ниңәлер террорсылар ҙа юҡ ине. Күрәһең, уларға бындай иректә диверсия ойоштороу ҡыҙыҡ булмағандыр.
Әшәке коммуняктар бына нәмә эшләне: теләһә ҡайһы ҡалаға киләһең, бер ниндәй проблемаһыҙ эшкә урынлашаһың. Астан да аяҡ һуҙмайһың. Өҫтәүенә, оятһыҙҙар предприятиенан түләүһеҙ фатир бирҙе. Командировкаға йөрөүселәр ашханала туҡланырға талон алды. Ҡунаҡхана. Барыһы ла бушҡа. Хөкүмәт иҫәбенә.
Аңламайым мин был коммуняктарҙы! Ҡыҫҡаһы, хәшәрәт улар!
И. ШАҺИБӘКОВ.