Һүҙ эйәрә һүҙ сығып, бөгөнгө көндә кешеләр менән кешеләр мөнәсәбәте, йәғни бер-беребеҙ менән мөнәсәбәттәр хаҡында һөйләшеп киттек.
– Беҙ кешелә насар яҡтарҙы ғына күрергә күнеккәнбеҙ. Уның белеменә лә, аҡылына ла, хатта талантына ла ҡарамайбыҙ, – тине ул. – Улай ғынамы, киреһенсә, ул белемлерәк, аҡыллыраҡ һәм талантлыраҡ булған һайын, унан ҡыйыҡ яҡтар эҙләйбеҙ.
Был – яңы фекер ҙә, асыш та түгел, әлбиттә. Әммә хаҡ. Хәтерегеҙҙәме, берәй йырсы йә артист популярлашып китһә, уның хаҡында мотлаҡ бер “шаҡ ҡатырғыс” хәбәр тарала: әйтәйек, теге йырсы ирен һуйған икән, был артист эсә башлаған, өсөнсөһө яттар менән сыуала башлаған икән, дүртенсеһе “голубой”, имеш. Тора-бара быларҙың береһе лә дөрөҫ булмауы асыҡлана, ул “шаҡ ҡатырғыс” хәбәрҙәр онотола, уның ҡарауы, яңылары пәйҙә була. Нимә был? Ниңә берәүҙәребеҙ шундай хәбәр тарата, башҡаларыбыҙ шуға ышана? Ысын күңелдән ышаныу ғына түгел, һөйөнә лә, шулай уҡ – ысын күңелдән. “Әһә, әллә кем булып йөрөгән була ине, ул – алама, мин һәйбәт икән әле”, – тип уйлайбыҙ. Ә бит киреһенсә булырға тейеш, ундай ғәйбәт хәбәрҙәрҙе ишеткәс, талантлы кеше өсөн беҙ ҡайғырырға тейешбеҙ, ә беҙ – һөйөнәбеҙ. Сөнки беҙгә ҡыҙыҡ. Йыуаныс. Ә ниңә шулай? Бының төбөндә көнләшеү ята, минеңсә. “Мин булдыра алмайым, ул да әҙәм көлкөһөнә ҡалһын әле!” Шулай уйлайбыҙ. Әлбиттә, мин был йәһәттән бөтәбеҙҙе лә бер ҡалыпҡа һалырға йыйынмайым. Кеше ҡайғыһына ҡайғырған, шатлығына шатланғандар бихисап. Әммә бының киреһен эшләгәндәр ҙә күп шул.
Кешегә ниндәй күҙ, ниндәй күңел менән ҡарайһың, ул кеше шулай ҡабул ителә, минеңсә. Кешенән кире яҡтарҙы ғына эҙләһәң, “һиңә кәрәкле” сифаттар мотлаҡ табыла. Һәм ул кеше тора-бара гел кире яҡлап ҡына күренә башлай. Бер ҡараһаң, был донъяла тулыһынса камил бер генә нәмә лә юҡ бит. Әйтәйек, ҡайын бик матур ағас. Әммә уларҙың да кәкре-бөкрөләре бихисап бит. Шул кәкре ҡайын, бер яҡтан ҡарағанда – кәкре, башҡа яҡтан ҡараһаң, төҙ күренә. Ҡыҫҡаһы, кәкре итеп күрергә теләһәң дә, төҙ итеп күрергә теләһәң дә, һинең иректә, һинең теләктә. Дөрөҫөрәге, ул ҡайынды нисек итеп күрергә теләһәң, шулай күрәһең.
Ҡайын бында миҫал итеп кенә алынды, әлбиттә. Кешеләрҙә лә беҙ ниндәй сифаттарҙы күрергә теләйбеҙ, шуны күрәбеҙ бит. Тулыһынса һәйбәт һәм тулыһынса алама кешеләр булмай, минеңсә.
Япондар ябай ташта ла матурлыҡ күрә, уға һоҡлана белә. Был сифатты улар кешелә бала саҡтан уҡ тәрбиәләй. Ә бит, ысынлап та, матур күҙҙәр менән ҡараһаң, бөтә нәмә лә матур күренгәндәй бит ул. Шул уҡ япондар бер-береһенә йылмайып өндәшә, йылмайып яуап бирә. Тимәк, бер-береһендә матурлыҡ күрә, бер-береһенә яғымлыраҡ күренергә тырыша улар. Бер-береһендә йәмһеҙлек күрергә теләһәләр, йылмаймаҫтар ине.
Ҡыҫҡаһы, был донъяға ниндәй күҙҙәр менән бағаһың, ул шулай күренә, шулай ҡабул ителә.
Был донъя бик йәмһеҙ,
бик йәмһеҙ,
Был донъя тотоштан көл генә,
Был донъя тотоштан
насарлыҡ –
Һин уға тик ҡарай бел генә.
Был донъя бик матур,
бик матур,
Был донъя тотоштан гөл генә.
Был донъя тотоштан
яҡшылыҡ –
Һин уға тик ҡарай бел генә.
Был донъя яҡшымы, насармы?
Иң дөрөҫ яуапты кем белә?
Донъяға кем нисек ҡарай бит –
Донъяға ҡарай бел һин бына!
Рәдиф ТИМЕРШИН.
Фото: vsegda-pomnim.com