Үҙенең генә көсө етерлек түгел, “Радуга”ның корпусы ағастан эшләнгән, ауырлығы ҡырҡ килограмм барҙыр, унан да артыҡ булмаһа әле. Дуҫымдың көс-ҡеүәте ташып торһа ла, аппаратты үҙе генә алып бара алмаған. Ватылған, ремонтларлыҡ түгел, шуға ташларға булған.
Бөгөн инә алмайым, арыным, бәлки, иртәгә, тим... Иртәнән һуң да шул уҡ һүҙҙәрҙе ҡабатланым. Ҡыҫҡаһы, аҙна буйы һуҙҙым. Ул мине осраҡлы ғына подъезд янында эләктерҙе. Был юлы һылтау таба алманым, телевизорҙы сүплеккә күтәрешеп барырға тура килде. Ниһайәт, алып барып еткерҙек. Ура! Эт булып арыныҡ, манма тиргә баттыҡ. Дуҫым барға саҡырҙы. Һыра эскәс, күңелдәр күтәрелеп китте, тел сиселде, яңы телевизор алғас, дуҫыма уны өйҙәренә индерешергә ярҙам итергә вәғәҙә бирҙем. Подъезд алдында бик йылы хушлаштыҡ.
Фатирға индем һәм... дөрөҫ. Алғы бүлмәлә әле генә беҙ сүплектә ҡалдырған телевизор тора. Шул уҡ модель, шул уҡ төҫ, ҡабырғаһында йәбештерелгән һүрәт тә шул уҡ... Ҡәйнәм йүгерә-атлай килеп сыҡты. Ҡәнәғәтлеге йөҙөнә сыҡҡан! Бытыр-бытыр һөйләй. Өйгә ҡайтып килгәндә ул сүплек янында ятҡан телевизорҙы күреп ҡала: “Халыҡ туйып һикерә!” Ул бындай телевизорҙы үҙ ваҡытында өс ай йөрөп 755 һумға һатып алған, етмәһә, магазин директорына 100 һум ришүәт биргән... Ә бында сүп-сар араһында ята.
Шуны аңламайым: ул уны яңғыҙы фатирға нисек индерҙе икән? Һәм ниңә? Фатирҙа һәр бүлмәлә телевизор, хатта аш-һыу һәм ванна бүлмәләрендә лә бар, бәҙрәфтә генә юҡ.
Дуҫыма шылтыратам, ярҙамың кәрәк, фатирҙан сүплеккә ауыр әйбер сығарырға кәрәк, тим. Ә ул миңә, бөгөн булмай, бәлки, иртәгә, ти... Нимә икәнлеген күргәс, уның йөҙөн күҙ алдыма килтерәм...
Б. ФӘСХЕТДИНОВ.
Фото: www.youtube.com