Был ваҡытта Айыу тәҙрә янында урамды күҙәтеп ултыра ине.
– Бер кем дә юҡ, хатта етеҙ Терпе лә күренмәй. Ниңә миңә ашығырға? – тине ул ҡатынына.
Терпе лә үҙ фатирынан урамға күҙ һалды.
– Ҡуян да сыҡмай бит әле, уның артынан ғына сығам мин, – тип һөйләнде.
Ҡуян үҙ фатирында ҡырт киҫте:
– Бурһыҡ сыҡһа, мин сығам!
Бурһыҡ был ваҡытта диванда телевизор ҡарап ултыра ине.
– Етер, көнө-төнө телевизор ҡарау булмай, бар өмәгә сыҡ! – тине уға хәләл ефете, кухня ишегенән башын тығып.
– Сыҡмайым мин! – тине Бурһыҡ арҡа терәгән мендәрен яйлап. – Теге өмәлә лә йортта йәшәгән януарҙарҙың яртыһы юҡ ине. Сыҡмаҫҡа был юлы минең сират.
– Ярай улай булһа. Шулай ҙа тик ятма әле. Тиҙ генә магазинға барып, көнбағыш майы алып ҡайт.
Бурһыҡ кейенде лә, сумка тотоп урамға атланы. “Әһә, береһе лә юҡ, күҙҙәренә салынмайынса ғына магазинға барып киләйемсе”.
Әммә урамдағы һәр хәрәкәт өйҙән бик һәйбәт күренеп тора бит ул. Бурһыҡты күргәс, һепертке тотоп Ҡуян сыҡты. Ҡуян артынан Терпе пәйҙә булды. Терпе сыҡҡас, Айыу күренде. Уларҙы шәйләп, башҡалар йыйылды.
Бурһыҡ магазиндан ҡайтҡанда ишек алдында ҡыҙыу эш ҡайнай ине. Йыйыштырыу менән мауыҡҡан йәнлектәр уны иҫкә лә алманы. Бурһыҡ тиҙ генә фатирына шылды.
Ул үҙ эшен эшләгәйне инде – өмә күңелле ауаздар аҫтында шаулап-гөрләп үтте.
Илдус ТИМЕРХАНОВ.