*Сит ҡатындарҙы әүрәтеүсе Дон Жуандар йәшәгән, йәшәй һәм йәшәйәсәк!
*“Тимур һәм уның командаһы” әҫәренән Тимурҙар ғына ҡалды, командалары юҡ.
*Фәстереү оҫтаһы барон Мюнхгаузен, беҙҙең заман алдаҡсылары менән сағыштырғанда, гонаһһыҙ сабый бала.
*Гоголдең ревизоры Хлестаков бөгөн берәй коррупционер йортона килеп эләкһә, иң бай кеше булып ҡайтып китер ине.
*Бөгөнгө байҙар – Гоголдең Плюшкинынан һараныраҡ.
*Туҡайҙың шүрәлеләрен бөгөн дискотекаларҙа күрергә мөмкин.
*Ғафуриҙың “Юҡтырһың ла Алла, әгәр булһаң, түҙеп тормаҫ инең был эшкә” тигән юлдарын бөгөнгө заманда көн дә ҡабатларға тура килә.
*“Хушығыҙ, хыялдарым!” Әнғәм Атнабаевтың ошо исемдәге пьесаһы, магазиндарға инеп, әйбер хаҡтарын күргән һайын иҫкә төшә.
*Бөйөк шағир үҙе хаҡында: “Ай да, Пушкин, ай да сукин сын!” – тигән. Бөгөнгө бәғзе бер “әһелдәр”: “Ай да я велик, башҡалар суҡынһын!” – ти.
*Максим Горькийҙың үҙ фамилияһы – Пешков. Хурлай торғас, тәки уны әҙәбиәт тарихындағы “пешка”ға әйләндерҙеләр.
*Мостай Кәримдең “Ҡыҙ урлау”ы театр сәхнәләренән генә түгел, тормош сәхнәһенән дә төшмәй: бөгөнгө әҙәм ҡараҡтары, байҙарҙың ҡыҙҙарын урлай ҙа, тегеләр “ҡалым” түләһә генә кире ҡайтаралар.
Зәйнәб Биишеваның илле алтыш йыл элек яҙылған “Кәмһетелгәндәр” романы һаман актуаллеген юғалтмай. Уны бигерәк тә эшһеҙ ҡалған кисәге колхозсылар һәм ҡайҙа һуғылырға белмәй ыҙа сиккән бөгөнгө эшселәр яратып уҡый, имеш.
*Наил Ғәйетбаев пьесаларының береһен “Әстәғәфирулла!” тип атап, бөгөнгө йәмғиәттең халәтен бер һүҙ менән әйткән дә биргән.
*Абдулхаҡ Игебаев “Оран һала Ер-әсә” патетик поэмаһын бынан илле йыл элек яҙған. Бөгөнгө Рәсәйҙең көнсығыштағы ерҙәрен ҡытайҙар “баҫып алырын” ҡайҙан белгән тиген?
*Яныбай Хамматов: “Бөртөкләп йыйыла алтын”, – тигән. Бөртөкләп йыйылған алтынға тиң мөлкәт тоҡлап-ботлап Мәскәү байҙарының һандығына күсә бара түгелме?
*Аҡмулла бер быуат элек: “Уҡыу кәрәк, уҡыу кәрәк!” – тигән. Бөгөн ул: “Уҡыу өсөн аҡса кәрәк, аҡса кәрәк!” – тиер инеме икән?
Ҡәләмдәр ТӨРТМӘТЕЛЕВ,
бөйөк фәлсәфүн.