-19 °С
Болотло
75 лет Победы
Бөтә яңылыҡтар

Отчет-һайлау йыйылышы

– Тәк, йыйылышып бөттөгөҙ­мө? Ғәҙәттәгесә, Фәһимә балдыҙ һуң­лай. Самай кәрәк ваҡытта килеп инә ул. Башлай торайыҡ.Бөгөнгө йыйылышты асып, шуны әйткем килә, туғандар. Ошо көн­дәрҙә өҫтән тикшереү килеп төшөүе бар, шуға һеҙҙе тағы борсорға тура килде. Үҙегеҙ беләһегеҙ, һеҙҙән башҡа ышаныр, таяныр кешелә­рем дә юҡ, балалар үҫмәгән әле, уларҙың да ва­ҡыты етер, кәнишнә.

Отчет-һайлау йыйылышы
Отчет-һайлау йыйылышы

Әлегә, үҙегеҙ күреп тораһығыҙ, донъялар бутал­сыҡҡа әйләнеп бара. Кем нисек булдыра ала, шулай йәшәп, әрһеҙе­рәктәр ябай халыҡты алдап маташа. Булдыра алма­ғандар үҙҙәре ғәйепле. Ну, дөйөм алғанда, кемгә еңел хәҙер? Бергә булырға кәрәктер, тип уйлайым... Тел төбөн аңлайһығыҙҙыр... Ҡхм, ҡхм...
Ярай, улайһа. Тәк, Сәлихә ҡо­ҙа­ғый, был арала ҡалаға, баҙарға тип сапмайыраҡ торорһоғоҙ, минең исемлектә һеҙ – мәктәп директо­ры. Ҡурҡма, һатыуға тигән ҡорот-эремсектәреңә бер нәмә лә бул­маҫ, тикшереү үткәс, үҙем машина менән барып, һатышып ҡайтырмын.
Мә, бына ошо ҡағыҙҙа яҙылған­дарҙы ятла, теге ваҡыттағы һымаҡ үҙеңдән бер нәмә лә өҫтәмә. Каби­неттың асҡысы – вахтала, уҡыусы­лар иҫкәртелгән. Кеҫәңә «тамыр» һан­дар ҡағыҙҙың артында яҙылған.
Дәлше киттек. Рәжәп ҡәйнеш, һин – өйрәнгән кеше, тағы ла шул ферма мөдире булып торорһоң. Ҡурҡма, бынау ҡағыҙҙа бөтәһе лә яҙылған. Тик күрһәткестәрҙе бутап ҡуйма. Гонорары тураһында бөгөн кис үҙем инеп сығырмын, шунда килешербеҙ.
Тә-әк, артабан, Мәүлиә еңгә, балалар баҡсаһы мөдире вазифаһы – һиндә. Үҙең беләһең, был өлкәлә һинән дә шәбе юҡ. Ул тауыш тиһеңме, үҙеңде тотошоң – һуйған да ҡаплаған мөдир. Эйе, ысынлап әйтәм. Йәл, уҡы­мағанһың ғына. Ул сағында.... тәүбә-тәүбә, әллә ни­мәгә төшөп барамсы... Ә-ә, Фирүз ағайымдың рөх­сәтен алдым, ул үҙе бер көнгә шунда ҡарауылсы бу­лырға ризалашты. Һеҙҙең менән дә ҡул бирештек.
Ә-һә, бына Фәһимә балдыҙ ҙа үҙ ваҡытын белеп кенә килеп етте. Ызначит, һин – клуб мөдире. Фи­гураң да, һөйләшеүең дә, йыл­майыуың да килешле. Тик юбкаң­дың оҙонорағын кейеп, ирен бу­яғысыңдың төҫһөҙө­рәген һөрт, йәме. Еҙнәкәйеңде белә­һең, буш итмәм. Тағы ла, ҡара әле, бал­дыҙым-яңғыҙым, тикшереү­се­ләр­гә бәй­ләнмә, пажалыста. Яңғыҙ булһаң ни, йәшең үтмәгән әле. Кем әйт­мешләй, самай һөйөр саҡ ҡына. Үҙем һиңә тигәнен генә табып бирермен. Күптән ҡарап та ҡуй­ғанмын. Тик һин кеше алдында минең йөҙҙө ҡыҙартма!
Тәк-тәк, эһе, бригадир... Теге ни бит әле, Нәзир бажа, һиңә генә күҙ төбәп торам. Минең ҡыҙған саҡта әйтелгәндәрҙе ғәфү ит, йәме... Ни ти­һәң дә, бажаларбыҙ, ғүмер буйы күрше йәшәйбеҙ. Яңы йортоңдо бөтөрөшөрмөн, балаларың, әйҙә, рәхәтләнеп беҙҙең быуала һыу ин­һен. Йәлке түгел. Тик һин күпте бе­­ләһең, белгәндәреңде онот, бына ошо ҡағыҙға һиңә лә текст төҙө­гәй­нем. Артыҡ һүҙ ысҡындырма. Ки­леш­текме? – тип тамамланы йыйылышты ауыл хакимиәте башлығы, мәктәп директоры, ферма мөдире, балалар баҡсаһы мөдире, клуб мөдире, бригадир вазифаларын бергә алып барыусы Ҡаҙнабаев. – Барыһы ла булды шикелле...

Рәзилә ЫРЫҪҠУЖИНА.

Автор:
Читайте нас в