Икенсе көндө иртән иртүк әсәһе хәстәрләп биргән бәлештәрҙе, «өслө»ләрҙән шығырлап торған аттестатын, паспортын йыйнаҡ ҡына итеп төйнәп, район үҙәгенә, дауаханаға юлланды. Шөкөр, оҙаҡ эҙләргә тура килмәне тағын үҙен. Һикһән йәштәр тирәһендәге ҡарсыҡ, әйтерһең, ғүмер буйы ошо һорауҙы ғына көтөп йәшәгән.
– Бер аҙ барғас та дүрт ҡатлы аҡ бина булыр. Духтырҙар шунда инде, балам, – тине.
Әбей өйрәткән Киров, Пушкин урамдарын үтеп, тәки эҙләп тапты дауахананы Ибрай.
Комиссия үтеүсе бер Ибрай ғына түгел икән, кабинет төбө һайын өйөлөшөп баҫып торған йәштәштәрен күреп, егеттең эсенә йылы инеп китте.
– Исемең, фамилияң, атайыңдын исеме, тыуған йылың? – тип ҡаршыланы уны беренсе кабинетта өлкән йәштәге табип ағай.
– Йылҡыбаев Ибрай Дәүләтбай улы.
– Нәҫелегеҙҙә ҡотороу, аҡылдан яҙыу, төндә һаташып йөрөү менән сирләүселәр юҡмы?
– Һуңғы ваҡыттарҙа һиҙелгәне юҡ әле...
– Дүрт дүртең нисә була?
– Ун дүрт...
– Ете етең?
– Ҡырҡ ете...
– Һигеҙ һигеҙең?
– Һикһән һигеҙ...
– Эсәһеңме?
– Көтөүҙә генә инде, ағай.... Көн оҙон бит, нишләп ятмаҡ кәрәк?
– Тартаһыңмы?
– Былай төпсөк йыйып йөрөгән юҡ, әммә ләкин ҡунаҡҡа ҡайтҡан ваҡыттарында еҙнәй берәрҙе биргеләй...
Табип һорауҙарына тыныс ҡына яуап биреп ултырған Ибрайға иҫе-аҡылы китеп ҡарап торҙо. Унан:
– Бына бындараҡ кил әле, Йылҡыбаев. Бына был нимә? – тип һораны бармағы менән стенаға төртөп.
Ибрай шул яҡҡа ҡарағандан һуң шатлығынан ҡысҡырып уҡ ебәрҙе:
– Сафура апай таблицаһы!
– Ниндәй Сафура тағын?! –Табиптың аптырауының сик-самаһы юҡ ине.
–Беҙҙең химия уҡытыусыһы Сафура апайҙың бүлмәһендә нәк шундай таблица эленеп тора!
– Менделеев таблицаһы ул, Йылҡыбаев! Бар, сыҡ. Һине ун дүртенсе кабинетта көтәләр.
Үҙен бик сәйер ҡиәфәттә оҙатып ҡалған табиптан сыҡҡас, Ибрай иң тәүҙә медицина карточкаһының һуңғы битен асып ҡараны. Унда матур, тигеҙ хәрефтәр менән «Годен» тип яҙылған ине.
Руфина ХӘСӘНОВА.