“Был Сәхи, нет Сәхи”
“Самогон” тигән ағыуҙы беҙҙең яҡта ҡуллана башлаған саҡта, һуғыштан һуңғы йылдарҙа булған был хәл. Бер төркөм йәш ирҙәр күрше урыҫ ауылынан көмөшкә алып ҡайталар. Яңы эсемлекте, етмәһә, сөгөлдөрҙән эшләгәнен, эсеп ҡарарға берәү ҙә батырсылыҡ итмәй тора икән. Фронттан ҡайтҡан Сәхиулла исемле ағай йәштәргә былай тигән: “Ярай, егеттәр, мин һуғыштан иҫән ҡайттым, балалар ҙа үҫеп бөткән, үлһәм үлермен, ҡайҙа башлап эсеп ҡарайым”.
Ағайың эсеп тә ебәргән, бер күҙен йомған да: “Был Сәхи, нет Сәхи,” – тип ултырған урынында йығылған да киткән. Ирҙәр, бәләһенән баш аяҡ, тип дөбөр-шатыр өйҙән сығып ҡасҡандар. Сирек самогон менән ни булғаны билдәле инде. Сәхиулла бабай унан һуң байтаҡ йәшәп, яңыраҡ ҡына донъя ҡуйҙы. Яңы эсемлек кенә түгел, ятыраҡ ризыҡ ауыҙлап ҡарағанда ла хәҙер “был Сәхи, нет Сәхи” тип мәрәкәләйҙәр беҙҙә.
Роза ХӘМЗИНА.
Кафура кәнфите
Көйөргәҙе районы Ялсыҡай ауылы лаҡаптарға бай, сөнки бында асыҡ күңелле, әсе телле, шаян кешеләр йәшәй. Ялсыҡайға ҡунаҡҡа барһаң, һәр ваҡыт тиерлек сәй эскәндә: “Кафура кәнфитен ҡушып эсегеҙ”, – тигәндәрен ишетергә була. Был лаҡаптың килеп сығышын һорағас, миңә ошоларҙы һөйләнеләр.
Ауылда Кафура исемле әбей йәшәгән. Бер ваҡыт магазиндан какао порошогына манылған “мендәр” кәнфите һатып ала ул. Ҡайтҡас, сәй эсер алдынан ҡараһа, кәнфиттәрҙең “саңлы” икәнен күрә.
– Атаҡ-атаҡ, бысраҡ кәнфит һатҡандарсы, вәт битһеҙҙәр! – тип, һуҡрана-һуҡрана ҡоштабаҡҡа һалып йыуа инәйебеҙ кәнфиттәрҙе. Ҡунаҡ килгәндә: ”Йыуып алдым. Минең кәнфитем таҙа ул, ашағыҙ аша,” – тип һыйлаған. Шунан һуң был һүҙҙәр лаҡап булып йөрөй.
“Ҡоймаҡты ашап бөтәһегеҙ бит...”
Был лаҡапты Мәләүез районы Иштуған ауылынан Күсәпова Рәшиҙә апай һөйләгәйне.
“Ауылда көҙгө һуғымдан һуң сиратлашып ҡунаҡ йыя торғайнылар. Беҙ, балалар, алъяҡта ҡорма артында урындыҡта урынлашабыҙ. Ҡунаҡтар ифрат оҙаҡ ултыра һымаҡ тойола ине. Бер ваҡыт шаяныраҡ ағайыбыҙ Миңнулла исемле ҡустымды урындыҡтан төшөрҙө лә ҡолағына нимәлер шыбырланы. Шунан беҙгә әйләнде лә:
– Ҡарағыҙ, хәҙер ҡыҙыҡ була! – тине. Миңнулла ҡунаҡтар ултырған яҡҡа сыҡты ла:
– Ҡасан ҡайтып китәһегеҙ, ҡоймаҡты ашап бөтәһегеҙ бит! – тип ҡысҡырҙы.”
Шунан һуң ҡунаҡ оҙаҡ ултырып ташлаһа, шаярып:
“Ҡоймаҡты ашап бөтәләр инде”, – тиҙәр икән бында.
Р. САБИТОВА.
Фото: dzen.ru