Минең дә дандарым таралды. Шуларҙың береһен бәйәнләйем әле. Берәй заман, кәйефем күтәренке булғанда, бүтәндәрен дә һөйләрмен.
Бер ваҡыт минең турала һәләк ирмәк һүҙ менән тирә-яҡ тулды. Төймә арҡаһында ғына дөйә ҡәҙәре хәбәр сыҡҡанын һиҙмәй ҙә ҡалдым.
Ҡыҙым Данүҫә ҡул эшенә әүәҫләнеп киткәйне. Кофта бәйләп кейҙе лә:
– Матурмы? – тип һораны.
– Төймәләре эре, – тинем, әйберҙе диҡҡәт менән ҡарағас. – Эре лә, үтә ваҡ та булмаған төҫтәш төймәләр һайла. Тәүге эшең, кофтаң ифрат килешә, афарин! – Мин баламдың күңелен күтәреп ебәрҙем.
Данүҫә, кәңәшемде тотоп, төймәләрҙе алыштырып тағып та ҡуйҙы:
Ҡатын-ҡыҙҙың тәбиғәте шундай: күҙҙәре нәҡ йылтыр-мылтыр нәмәләргә төшә.
– Аһ-аһ, төймәләре былай-алаймы, бигерәк матур. Зауҡың да бар икән! – тип һоҡланғандар.
– Әсәйем ошоларҙы алырға кәңәш итте. Олоғайып барһа ла, матурлыҡты йәштәрсә тоя, йәштәрсә һиҙә. Уның кәңәшен тотһам, уңам да ҡуям, – тип үк ебәргән Данүҫәм.
– Әсәйең һәйбәт кәңәшсе икән. Яҡшы кәңәшкә мин дә мохтажмын. Ҡунаҡҡа килһен! – Сәтиғә исемле ҡатынҡай ҡыҙыма өй адресын биргән.
Киттем Сәтиғәне эҙләп, йортон йәһәт таптым.
Сәтиғә мине ихлас ҡыуанып ҡаршыланы, һыйҙан һығылып торған өҫтәлгә әйҙүкләне.
– Яландай квартирала әллә бер үҙең йәшәйһеңме? – Мин ғәжәпләнеүемде йәшерә алманым.
– Ирем һулға йөрөргә ғәҙәтләнде, аҙна – ун көнгә бер ҡайта. Шуға, Даниә апай, артабан ни эшләргә, тип кәңәш һорарға саҡырғайным. –Күҙҙәренә йәш эркелгән ҡатынҡай тәрән көрһөндө.
– Көсөк ал, һеңлем! Һунар тоҡомонан һайлаһаң, ишшү ҙә һәйбәт. Көсөк сағынан ирекәйендең нәски йә күлдәген еҫкәтеп үҫтер. Еҫ-ҡоҫто айырырға күнекһә, иреңде күмәк кеше араһынан да еңел табасаҡ. Мин ҡушҡанса эшләһәң, күр ҙә тор – бермә-бер килешәсәк.
Сәтиғәнең кинәнеүен күрһәгеҙ!..
Ғүмерҙең үткәне һиҙелмәй шул. Бер көндө беҙгә, ҡояштай ялтырап, Сәтиғә килеп керҙе:
– Мең йәшә, Даниә апай! Көсөгөм башмаҡ ҡәҙәре булып үҫте. Нәҡ һин кәңәш иткәнсә тәрбиәләнем. “Рекс, хужаңды эҙлә!” тигән фарман биреүем була, уҡтай урамға атыла. Ярты сәғәт тә үтмәй, салбар балағынан тешләп, аҙманды өйгә алып та ҡайта. Яңыраҡ һөйәркәһенә лә “тешен күрһәткән”. Бисура бисә дауаханала ятып сыҡҡан. Ветстанциянан килеп, ҡотороҡ сиренә анализ алғайнылар, шөкөр, Рексыбыҙ һап-һау, тап-таҙа. Хәҙер йәнкәй-йәнәшем уңға-һулға ҡайырылмай.
Сәтиғәнән былайыраҡ ҡыуандым: йәш ғаиләне тарҡалыуҙан ҡотҡарҙым бит.
– Даниә апай, кеҫә телефоныңдын номерын яҙып алайым әле, әхирәтем һорағайны, – ти Сәтиғә һеңлекәш.
– Шылтыратһын, өгөт-нәсихәт бирергә һәр саҡ әҙермен! – Мин йәһәт кенә телефон номерымды һондом.
Кискә Сәтиғәнең әхирәте, дөрөҫөрәге, әхирәтенең йәмәғәте шылтыратты:
– Даниә апай, мин – Фитрат Нитратович тигән кешемен. Кәңәш кәрәк,– ти.
– Ҡустым, хәл-әхүәлеңде мөмкин тиклем төпсөрләп һөйлә, шунһыҙ төплө кәңәш биреп булмай, – тим.
Телефондан ярамай, һеҙгә барабыҙ!
Фитрат ҡусты ҡатынын эйәртеп килеп тә етте. Хәлдәре ҙур аҡсаға бәйле икән. Бер генә бүлмәле квартирала иркенләп гәпләшергә мөмкинлек юҡ. Фитрат Нитратовичтарға киттек.
– Дәниә апай, “Фольксфаген” тигән машина алайыҡмы, әллә “Тойота” тигәненме? – Ир менән ҡатын минең ауыҙға ғына ҡарап тора.
– Ҡарҙы ситкә ышыра торған һоҫҡоло трактор алығыҙ, – тим.
– Төшөндөм: тимәк, һөҙгөслө трактор, ә ул нимәгә? – Фитрат ҡусты аңшайҙы, ҡатыны күҙҙәрен аҡайтты.
– Әле ҡарап килдем: машина күп – алма төшөрлөк тә урын юҡ. Ҡала урамдарынан йөрөү ҙә ҡыйынлашты: элек беҙ белмәгән-күрмәгән “тығын” тигән нәмәнән йонсой бит халыҡ. Фитрат ҡустым, тракторыңдың һөҙгөсө менән үҙеңә ҡамасауламаған машиналарҙың бер нисәһен ситкә этһәң, аҙаҡ шоферҙар үҙҙәре үк һиңә юл бирергә әмәлен табыр.
Машинаңды гел генә гаражда тота алмаҫһың, йортоң алдына ҡуйырға ла тура килер. Баяғы алымды ҡабатларһың.
Һуңынан ишеттем: ҡусты минең кәңәшемде тотҡан: бер нисә машинаны ситкә ышырған. Кеше яуыз бит хәҙер: зыян күреүселәр Фитратты судҡа биргән, тракторын һаттырып, аҡсаһын бүлешкән. Шулай итеп, ҡусты төрмә тигән нәмәнән саҡ ҡотолған.
Ошо хаҡта ишеткәс, шатлығымдың иге-сиге булманы. Хәҙер Фитрат Нитратовичҡа теләгән машиналарын алырға мөмкин: йорто алдында, тәҙрәләренең ҡаршыһында ғына ике-өс машина ҡуйырлыҡ буш урын бар.
Квартирама ҡайтҡан көндө үк минең арттан сибә-ә-әр ханым килеп етте.
– Кәңәш кәрәк! – тине ул, сәләмләшергә лә онотоп. – Даниә апай, ҡунаҡҡа алып ҡайтам. Һеҙҙә иркенләп һөйләшергә мөмкинселек юҡлығын иҫкәрттеләр.
Өмәмә ханымдарға юлландыҡ. Уларҙа сәй эсә-эсә эстәр бушағансы серләштек. Ҡамасаулыҡ итеүсе юҡ: ире сит илгә оҙайлы командировкаға киткән.
Баҡһаң, Өмәмәнең йәмәғәте бохар бесәйе алырға рөхсәт итмәй икән. Эт менән бесәй яратмай, ти.
– Бала табып бир! Бәпес һөйөп кинәнегеҙ!
– Мин бала яратмайым! – Өмәмә, кәңәшемде өнәмәүен белдереп, матур танауын сирылта.
– Улайһа, юлбарыҫ балаһын ал! Бик бай йәшәйһегеҙ: 300-350 мең доллар һеҙгә моң да түгел.
– Кәңәшеңә рәхмәт, Даниә апай! Бындай уй нисек башыма килмәгән. Дуҫтарымды, туғандарымды, уларҙан да бигерәк ирекәйемде аптыратайым әле! – Өмәмә битемдән суп иттереп үбеп алды.
Аҙаҡ ишеттем: ҡатынҡай юлбарыҫ балаһын һыртынан һыйпап ҡына үҫтергән.
Командировканан ҡайтҡан ирекәй ҡатынының был ҡылығына таң ҡалған. “Үрмәксенән күрмәксе” тигәндәй, бисәһе кеүек юлбарыҫты иркәләргә һонолоуы булған, йыртҡыс күҙ асып йомғансы ҡул суғын һоғонған да ҡуйған. Юлбарыҫты зоопаркка оҙатҡандар. Бизнесмен иргә протез ҡул ҡуйғандар.
Минең нисек һөйөнгәнемде күрһәгеҙ!.. Бәй, ҙур ярҙамым тейҙе: бер ҙә түгел, ике бохар бесәйе бүләк иткән дәһә ирекәйе.
«Иҫ киткес шәп кәңәшсе» тигән шөһрәтем шулай таралды. Хәҙер мине машинала ғына алып ҡайтырға теләүселәр бигерәк күбәйҙе. Өйгә төшкәнем дә юҡ, ваҡыт етмәй.
Күпме ғүмер үткәндер, бер көн Данүҫә ҡыҙым шылтырата:
– Әсәй, мотлаҡ ҡайт, кейәүгә сығам. Түрҙә генә ултырырһың, – ти.
Туй бит ул: нисек ҡайтмайһың. Туй ресторанда булды. Әммә ҡоҙа-ҡоҙағыйым эргәһендә рәхәтләнеп ултырырға яҙманы. Артымдан килгәндәр: тағы сығып киттем. Ҡоҙа-ҡоҙағыйымды, ҡоҙасаларымды, кейәүемде бүтән ерҙә осратһам, танымаҫым көн кеүек асыҡ.
Данүҫә ҡыҙым тағы шылтырата:
– Әсәй, ҡайт, ейәнсәреңде мотлаҡ күрергә тейешһең, – ти.
Ейәнсәр бит ул, нисек ҡайтмайһың?.. “Әһә, – мин әйтәм, – сабыйҙы нисек йыуындырырға, нисек биләргә, нисек имеҙергә кәңәш кәрәк!”
Такси ялланым, әммә йортто таба алмайым. Бәхеткә таксист минең хаҡта яҡшы белә икән. Ғаиләһе мине саҡырырға уйлаған. Телефон номерым, йортомдоң адресы кеҫәһендә ятҡан. Улар халҡының белмәгән йорто, белмәгән юлы юҡ. Минең йортто ла тапты. Баҡһаң, йорт тирәләй банктар, кибеттәр, дарыуханалар төҙөп бөткәндәр.
Ярай, ҡайтып керҙем. Күбәләк кеүек талпынып ике йәштәрҙәге бәләкәй генә ҡыҙ бала ҡаршыма килә.
– Бала-сағалы ҡунаҡтар бармы? – тип һорайым.
– Ейәнсәрең бит ул, әсәй! – Данүҫәм йылмая. Минең ышанмауымды күреп, өҫтәп ҡуя. – Туй көнөндә сығып киткәнеңә өс йыл тулды бит, әсәй!
Ҡара һин уны, биләмдә йөрөүемә өс йыл тулған, ә өс көн ҡәҙәре лә тойолманы.
– Имен-аман ҡайтыуығыҙ менән! – тине аш-һыу бүлмәһенән сығып килгән килбәтле генә егет.
Кемлеген әлдә һорарға өлгөрмәнем, ейәнсәрем: “Әт-тә!” – тип уның ҡаршыһына йүнәлде. Данүҫәмдең йәндәй йәмәғәте. Үҙемдең берҙән-бер кейәүем икәнен шунда уҡ төшөндөм.
Данүҫәм эшкә сыҡты, мин ейәнсәремде ҡарайым. Квартирабыҙҙы киңәйткәс, ҡаланың икенсе районына күсендек. Әммә ғәләмәт ҙур көскә эйә икән ул “дан” тигәндәре, һис тындырмайҙар. Магазинға ла барып булмай: таныйҙар бит, кәңәш һорап, артымдан эйәрәләр. Ныҡыш кешеләрҙән нисек ҡотолорға белмәйем.
Ауыр хәлдән арынырлыҡ арыу кәңәш бирегеҙ!