Утыҙын үтеп тә әле һаман арҡырыны буйға әйләндереп һалырға ашыҡмаған малай тағы таҫма телләнде.
– Ну, әсәй, тағы башланың инде шул нотацияларыңды. Ярай, ярай... Ялҡыттың бит инде.
Әсә улының күҙҙәре шешенеп, ауыҙҙары салшайып киткән йөҙөнә ҡарап ҡурҡып уҡ ҡуйҙы. «Уй, бәпескенәһе әллә нишләгәнсе, бер-бер хәл булып ҡуймаһын». Ул кеҫәһенән һуңғы һумдарын соҡоп сығарҙы.
– Мә!
Башын йүнәтеп, бер сама кеше һымаҡ булғас, Андрей уйға ҡалды. Әсәһе дөрөҫтө әйтә түгелме? Ысынлап та, аҡса тапмаҫлыҡ әкәй-шөкәй кеше түгел дә, буй тиһәң, буйы, уҫлаптай йоҙроҡтары бар.
Көндәрҙең береһендә ул магазинда кәшүлеген соҡоп торған ҡатынды күрә лә күҙҙәре ятлап китә һәм, бесәй етеҙлегендә ялп итеп, уның янсығын алып та тая. Әммә йыраҡҡа ҡаса алманы – милиционерҙар унан да сосораҡ булып сыҡты. Бер аҙ төрмәлә ял итеп сыҡҡас, Андрей йәнә шул уҡ йырын йырлай башланы.
– Әсәй, баш ҡутарылып килә, бер яртылыҡ ҡына...
Ни эшләргә белмәгән меҫкен әсә тағы шул уҡ һүҙҙе ҡабатланы:
– Балам, үҙеңә аҡса эшләргә ваҡыт...
Андрей йәнә мәлен эҙләргә тотондо һәм тапты. Юҡҡа ғына мәктәптә бөтә стена гәзиттәрен эшләргә уға ҡушмай торғайнылар. Хатта һүрәт төшөрөү буйынса уға еткән кеше юҡ ине. Шулай итеп, Андрей, ысынлап та, аҡса эшләй башлай. Әлбиттә, ун һумлыҡ, йөҙ һумлыҡтар менән бысранып торманы, шундуҡ бер меңлектәрҙе эшләй һәм хатта яҡшы килеп сыға. Егет ҡыуанысынан: «Бына бит булдыра алам», – тип усын – усҡа һуға. Әммә уның ҡыуанысы оҙаҡҡа барманы. Магазиндар буйлап тәмәке, йә башҡа нәмә алып йөрөгәндә ҡаптырҙылар ҙа ябып та ҡуйҙылар.
Хәҙер аҡсаны башҡа төрлө эшләргә кәрәклеген аңлар, моғайын, Андрей.
В. АЙҘАРОВ.