Бына, ниһайәт, банктан кредит алып, туған-тыумасаға муйындан бурысҡа батып, «Жигули» алдылар. И-и ул машинаның матурлығы, эсенән килгән бензин эҫе! Үләһең дә китәһең инде! Йорт янында торған сейә төҫлө машинаһына һоҡланып туя алманылар.
Ҡатынын ултыртып, ГАИ-ла теркәтеп, номер алып ҡайттылар. Машинаны ул күҙ алдындараҡ торһон тип, тәҙрә ҡаршыһына ҡуйҙы. Беренсе төндө, ҡатыны менән сиратлашып, һаҡлап сыҡтылар. Кешегә ышаныс юҡ бит, урлап алып китһәләр!
Ғафуан машина алыу өсөн, отпускыға сыҡҡан ине. Иртән сәй эскәндә һөйләшеп кәңәшләшкәс, көн һайын былай һаҡлап ултырып булмаҫ, сигнализация ҡуйҙырырға кәрәк, тигән ҡарарға килделәр. Улар кейенеп сыҡҡанда әле иртә, яҡтырып та өлгөрмәгәйне. Машинаның ишеген асып, ҡатынын ултыртты. Унан һуң ҙур ҡәнәғәтләнеү менән алғы тәгәрмәсенә тибеп алды. Әкрен генә инеп машинаһын ҡабыҙҙы, бер аҙ йылытып ултырҙы. Шулай итергә кәрәклеге тураһында китабынан уҡыған ине. Тиҙлекте ҡушып ҡарай, машина һелкенмәй, нимә булыр был!
– Әллә ҡул тормозына ҡуйылмағанмы был? – тине ҡатыны. – Юҡ, рычаг төшөрөлгән.
Машинанан төшөп, уны әйләнеп сыҡты.
– Э-эх, яуыздар – артҡы тәгәрмәстәре юҡ бит!
Икеһен дә һалдырып, аҫтына кирбес ҡыҫтырғандар. Ир менән ҡатын ултырып ҡына иламанылар.
Бер аҙ тыныслана төшкәс Ғафуан тәгәрмәс алырға кибеткә китте, ҡатыны машинаны һаҡлап ҡалды. Бер сәғәттән ул манма тиргә батып, тәгәрмәс күтәреп, килеп етте. Берҙе алған, икенсеһенә запастағыһын ҡуйҙылар.
Йәнә машинаға инеп ултырҙылар. «Жигули» бер-ике «сөскөрҙө» лә һүнде. Бензин күрһәтеүсе приборҙа ҡыҙыл ут яна, тимәк, теге яуыздар бакты бушатҡандар. Ҡыҙарынып-бүртенгән Ғафуанға канистр күтәреп, заправкаға китеүҙән башҡа сара ҡалманы. Бактың ҡапҡасы юҡ! Бензин һалып машинаһын ҡабыҙҙы ла баҙарға китте. Яңы ҡапҡас алды.
Сервисҡа барып, сигнализация ҡуйҙырҙылар. Унан һуң милицияға барып, ғариза яҙҙылар.
– Ағай, машинаңды страховать итергә кәрәк, – тине мыйығы ла сыҡмаған лейтенант. – Ә тәгәрмәстәреңде эҙләп ҡарарбыҙ...
Страховкалаусы ойошмала халыҡ күп ине, сират. Унан һуң ойошма төшкө ашҡа ла туҡтап алды. Ғафуан ҡатыны менән сиратта алмашлап торҙолар. Ниһайәт, сәғәт дүртенсе яртыларҙа, сират уларға ла етте.
Ҡарын ас. Эстә бүреләр олой – ҡатыны менән кафега инеп, тамаҡ ялғап сыҡтылар. Тамаҡ туйғас, кәйефтәре лә бер аҙ күтәрелде.
– ЮХХДИ инспекторы, сержант Петров, һеҙҙең документтарығыҙ!
Ғафуан ҡурҡып китте, уның янында милиционер баҫып тора ине. Ул ярамаған урында туҡтағанһың тип штраф сәпәне. Штрафты фәлән урындағы банкта түләйһең икән. Шунда киттеләр.
Банкынан боролоп сыҡҡанда, үҙе лә һиҙмәҫтән, берәүҙең «Москвич»ын сыйҙырҙы. Машина хужаһы үтә ваҡсыл бәндә булып сыҡты.
– Әле буятҡаныма бер ай ҙа юҡ, әрәм иттең машинамды. Давай өс мең һумыңды, йә милиция саҡыртабыҙ, – тигән була теге тутыҡҡан машинаһын һыйпап.
Ғафуан ҡатыны менән икеһе кеҫәләрен, сумкаларын аҡтарып сыҡтылар, ун өс һумдан артыҡ табылманы.
Машинаһында өйгә аҡса артынан ҡайтып китте, ҡатыны «заложник» булып теге бәндә янында ҡалды. Ҡулына аҡса эләккәс, ул һаубуллашмай ҙа китеп барҙы.
Ҡатынын ултыртып, ҡайтырға сыҡты. Юлда уларҙы тағы бер һынау көткән икән: алғы тәгәрмәс тишелде. Ир ҡатынын машинаһы янында ҡалдырып, йәнә аҡса артынан өйгә йүгерҙе. Бер аҙҙан, яңы тәгәрмәс күтәреп, килеп етте. Яңыһын ҡуйып, тишеген багажнигына һалып, шиномонтажға киттеләр. Яматып алып, өйҙәренә ҡайттылар.
– Ғафуан, ҡара әле, көнө буйы ҡайҙа ғына барманыҡ, күпме эш эшләнде машина булғас! – тине ҡатыны.
– Һөйләмә инде, машина булмаһа беҙ уларҙың береһенә лә етешә алмаҫ инек, – тине Ғафуан шатланып, ҡатынының битенән үбеп алды.
Фәнүз ХӘБИБУЛЛИН.