Шунан күршеләргә йыуаса өләшәйем тип, каридурға сыҡтым, һәр береһенә ике ауыл күкәйе, бер бәйләм йәшел һуған алдым батмусҡа һалып... Биш ишекте ҡаҡтым, береһе лә асманы, әллә өйҙә юҡтар... әллә ишетеп тә ҡолаҡтарына элмәйҙәр...
– Ысынмы?
– Эйе, шул булдымы күршеләр! Беҙҙә улай түгел-л-л! Юҡ-ҡ! Мин частный йортта торам, забур аша, Гөбби, әйҙә сәй эсәргә-ә-ә! – тип ҡысҡырһаң, Гөбби уже тупһала!
– Шулайҙыр!
– Эйе, ҡыҙым өйөнөң ихатаһында машина-а! Туғыҙ ҡатлы йорт, туғыҙ ҡатлы машина... Бала-сағаға уйнарға урын юҡ! Бер эскәмйә тора! Унда ла көнө буйы алкаш ирҙәр, ҡатындар һыра эсә. Быны күреп торған йәш үҫмерҙәрҙән кем үҫә инде!
– Шулай шул!
– Эйе! Ә һин Затунда йәшәгән сатан Саҙрыйҙы беләһеңме?
– Юҡ!
– Бына ул һине беләлер әле... Сөнки, ул бөтә Өфөнө белә, хатта “Сельхоз”да торған Исхаҡты ла белә!
– Кем һуң ул?
– Әй, апайым! Исхаҡ ул – Өфөнөң танылған берәҙәге!
– Кит, булмаҫты!
– Эйе, йәйен эскәмйә аҫтында йоҡлай, ҡышын “Сельхоз” туҡталышындағы люк эсендә...
– Ундай туҡталыш юҡ хәҙер!
– Һинең өсөн юҡтыр, минең өсөн бар, апайым!
– Шунан?
–Ултырған да шыуған! Исхаҡҡа кемдер 50 һум хәйер һонғас, ул әбейенә күстәнәс булыр, тип, киоскынан кәтлит һатып алған.
– Ә ниңә кәтлит?
– Исхаҡтан һора...
– Алып ҡайтып ҡыҙҙырып ашағандар...
– Әбейе лә люк эсендә йәшәйме?..
– Менә инде! Һалҡын примус өҫтөндә инәңдең ҡайнап ултырған һөтө!.. Быйыл бер әбейгә йортҡа кергән Исхаҡ!
– Ә!?.
– Ирҙәргә ҡытлыҡ бит беҙҙә хәҙер. Эйе, шулай итеп, теге кәтлиттең нимәнән әтмәләнгәнен тәки, аңламағандар... Иттең “и” хәрефе лә булмаған унда...
– Инде!..
–Эйе!
– Инәкәйем! Ниндәй хәлгә ҡалғанбыҙ. Ниңә һинең менән һөйләшеп ултырам һуң әле. Ҡайтам, Затунға ҡайтам!.. Унда мутанттар йәшәмәй.
– Йәшәмәй! Ағыулы һауа. Һыу, ашамлыҡ настоящий түгел, ҡайҙан килгән кеше?..
– Шулай шул, кешеләрҙән һин дә, мин генә ҡалғанбыҙ әбей! Мутант тапһаҡ былай һөйләшеп ултырмаҫ инек тә!
– Ә ниңә беҙ генә?
– Маяға!
– Эх, һалҡын примус өҫтөндә ҡайнаған һөт!... Бына нисек икән донъялар! Туҡһан йәшкә етеп шуны белмәгәнмен! Ярай, сатан Саҙрый белгәндер, гел мыйыҡ аҫтынан йылмайып йөрөй...
– Шулаймы?
– Шулайҙыр шул... Әйҙә, апайым, Затунға, исмаһам, самауырҙы йығып, бер ултырып, иҫ китеп мутанттар тураһында һөйләшербеҙ...