– Әлә-лә-лә-л, ҡалай матур! – тип ҡулдары менән сәпәкәйләне ул.
– Рәхмәт, – тип әсәһенең битенән суп иттереп үбеп алды.
Ысынлап та, ҡурсаҡ ҡарап туйғыһыҙ ине. Күлдәгенең матурлығы һуң! Хәс йырсы апайҙарҙыҡы кеүек ҡабарып-ҡабарып тора. Ҡолағында алҡаһы ла бар. Хатта исемен дә әйтә белә бит әле.
Алтынай ҡурсағын шул ҡәҙәр ныҡ яратты. Уны саҡ ҡына ла ҡулынан төшөрмәне. Үҙе менән етәкләп йөрөттө, көйләй-көйләй йоҡлатып та алды.
Бына әсәһе ашарға әҙерләне лә:
– Балаҡайым, әйҙә тәмле итеп сәй эсеп алайыҡ, – тип ҡыҙыҡайҙы өҫтәл янына саҡырҙы.
Алтынай ҡурсағы менән бергә килеп ултырҙы. Әсәһенең:
– Ҡурсағыңды алып ҡуй, йә, өҫтөн бысратып ҡуйырһың, – тиеүен ҡолағына ла элмәне.
– Юҡ, бысратмайым! – тип үҙһүҙләнде ҡыҙ.
Шул саҡ көтөлмәгән хәл булды. Боршанлап ултырған ҡыҙыҡай терһәге менән яңылыш сынаяғын этеп ебәргәнен һиҙмәй ҙә ҡалды. Сәй ҡурсаҡтың күлдәгенә генә түгелде лә ҡуйҙы. Ә сынаяҡ иҙәнгә барып төштө лә селпәрәмә килеп ватылды.
– Әсәй, ҡурсағым бысранды-ы-ы! – Әле генә шат йылмайып ултырған ҡыҙыҡай ауыҙын бәлшәйтеп илап ебәрҙе.
Әсәһе уны тынысландырҙы.
– Йә, ҡыҙым, юҡҡа балауыҙ һыҡма, хәҙер ҡурсағыңдың күлдәген йыуып эләм, элекке кеүек булыр. Ашағанда өҫтәл янына алып ултырғаныңды оҡшатманы бит ул.
Ғ. ИБРАҺИМОВ.