Мин маҡтанырға ла, аҡланырға ла уйламайым. Ул һаман һүҙ бутҡаһын ҡуйырта.
– Район үҙәгенә автобуста китеп барам. Ике бисә бөтә салонды яңғыратып, күршеләренең көнитмеше менән таныштырып барҙы. Күршеләре ун өс йыл буйына әтәс көнөндә йәшәгән. Бер-береһенең күҙҙәрен генә суҡып алмағандар. Рюмка тота торғас ун дүртенсе йылында йәрәшкәндәр. Хәҙер бер-береһе менән ымлашып ҡына һөйләшәләр икән.
– Телдән яҙғандармы ни? – тип Хәрисәне бүлдерәм.
– Тыңлап бөтөр башта. Икеһенең дә ҡыҙҙары ҡалаға һатыусыға уҡырға киткән. Таныҡлыҡ урынына бәпес күтәреп ҡайтҡандар. Әсәләренә “бүләктәрен” ҡалдырып китеп тә барғандар. Күршеләрҙең тын алырға ла ваҡыты юҡ, бәпес үҫтерәләр. Бер-береһе менән осрашҡанда “салют”, “привет” тип кенә өндәшергә ҡалған. Ауыл хәбәрсеһенә шаҡ ҡатырлыҡ хәбәр бит!
Хәрисә сәйен уртланы ла сираттағы ғәйбәтенә тотондо:
– Өсөнсө көн магазиндан ишетеп ҡайттым. Үҙем тыңлап торҙом. Хас минең малай, бер генә айырмаһы ла юҡ, ауыҙға һыу ҡабып, тайыу яғын ҡараным. Минең шалапай ҙа эшкә барам тип аҡса услап, ҙур сумкаһын бер аҙналыҡ аҙыҡ менән тултыра ла бер-ике көндән әйләнеп ҡайта. Бурысҡа алып торған аҡса ла юҡ, аҙыҡ-түлектән дә елдәр иҫкән. Теге ҡатын шулай малайын һөйләне-һөйләне лә тетмәһен тетеп ҡайтып китте. Кеше үҙ балаһының яманатын сығарыр икән. Бына ошоно ла яҙ, ҡалдырма.
Ауыҙы тулы хәбәр – ҡайҙан йыйып бөтәлер, торғаны бер ғәйбәтсе. Һин, Хәрисә, йылғанан да оҙонораҡ итеп хәбәр түгел, ә ғәйбәт йыяһың. Үҙең дә белеп тораһың, ғәйбәттең һәйбәте булмай.
Флүрә ХӘЛИЛОВА.
Фото: m.tabor.ru