Лифт көткәндә

– Бәләгә тарымаҫ өсөн.
– Ниндәй бәләгә?
– Балалар еңел, лифт ишеге ябылыуы ихтимал. Бындай хәл булмаһын өсөн, башта өлкәндәр инә, кәрәк булһа, ишекте тотоп тора. – Атай кеше сабыр ғына аңлата.
– Ә сыҡҡанда?
– Башта балалар, шунан өлкәндәр.
– Ә ни өсөн бында, ҡатын-ҡыҙҙар лифтҡа ир-аттар артынан инә, тип яҙылған? Уларҙы бөтә ерҙә лә алдан үткәрергә кәрәк бит. – Ҡыҙыҡһыныусан малай һорау артынан һорау яуҙыра.
– Ошо уҡ сәбәп арҡаһында.
Атайҙың улының һәр һорауына төплө яуап биреүе күренеп тора.
– Улар әсәйем кеүек еңелме? Шуға күрә лифттың ябылыуы ихтималмы?
– Эйе. Башта ир-ат инә, һуңынан ҡатын-ҡыҙ. Уның менән берәй хәл була ҡалһа, ир-ат ярҙамға килә.
Яныбыҙҙа бер ханым пәйҙә булыу менән, лифт ишеге асылды. Ул беҙҙе этеп-төртөп лифтҡа инде лә: “Мин яңғыҙым китәм”, – тине.
Лифт юғары менә башланы. Малай атаһына боролдо:
– Иҫеңдәме, һин миңә, борон заманда таныш булмаған мәмерйәгә беренсе булып ҡатын-ҡыҙ ингән, әгәр уны ҡырағай йәнлектәр ашамаһа, уның артынан ир-ат һәм башҡа ғаилә ағзалары ингән, тип һөйләгәйнең.

Ғ. ИМАМОВ.