+8 °С
Болотло
Бөтә яңылыҡтар
Йөҙ йыллыҡты ҡаршылап...
23 Сентябрь 2025, 13:50
Любовь САЙРАНОВА
Любовь Ишкилде ҡыҙы Сайранова 1949 йылда Йылайыр районы Юлдыбай ауылында тыуған. Оҙаҡ йылдар “Һәнәк” журналында эшләне. БӘХЕТҺЕҘ МӨХӘББӘТ ҠОРБАНЫ Яҙ көнө йәш егетте – бәхетһеҙ мөхәббәт ҡорбанын реанимация бүлегенә һалалар. Әйтергә кәрәк, яҙ шундайыраҡ хәлдәр йыш була. Егет үлергә иҫәп тотоптор инде, ниндәйҙер дарыуҙар эсеп ағыуланған. Ашҡаҙанын йыуҙырып, әҙәм рәтенә индереп кенә алғайныҡ, ул аңына килгәс: – Үләм, мин унһыҙ йәшәй алмайым, – тип ҡысҡыра башланы. Эштең ниҙә икәнен аңлап алғас, беҙ уны карауатҡа бәйләп ҡуйҙыҡ. Эш яйланғас, егетте реанимациянан палатаға күсереү миңә йөкмәтелде.
Любовь САЙРАНОВА
Мин тегене елтерәтеп тигәндәй, тар коридор буйлап алып китеп барам, ә үҙем, күрмәгәнеңде күрһәтәйем әле, тип уны әҙерәк ҡурҡытып алырға булдым.
– Әй, һинең йәшәгең килмәй икән дә ул, шулай булғас, һине ағзалар доноры итербеҙ ҙә ҡуйырбыҙ… – тип капельницаһын һурып алдым да артабан юлды дауам итәбеҙ. Ул ҡурҡыптыр инде, бер аҙға шымып ҡалды. Лифт эргәһенә килеп еттек. Ағыуланған егетте өҫкө ҡатҡа мендерергә кәрәк булһа ла, мин аҫҡы ҡатты – моргты һайланым.
– Моргҡамы, әллә палатағамы?
Егет ап-аҡ булып китте һәм табиптарҙы, һеҙ кеше үлтереүселәр, тип һүгергә тотондо. Аҫҡа төшөп еткәнсе бар көсөнә аҡырып, үҙенә ярҙам итеүҙәрен һораны:
– Зинһар ярҙам итегеҙ, үлтерәләр бит!
Ауырыуҙар, йәш егеткә ҡарап, етмәһә, каталкаға бәйләнгәнен күреп, был бер төрлө, күрәһең, тип иғтибар итмәй генә үтеп-һүтеп йөрөүендә булды. Шулай ҙа берәүһе телгә килде:
– Үлем бик ҡурҡыныс түгел, түҙ, тиҙ генә була ла ҡуя…
Палатаға килеп еткәндә егеттең йөҙөнә ҡарарлыҡ түгел ине…
Артабан ул үҙ-үҙенә ҡул һалыу тураһында ләм-мим, мин үткәргән дәрес, шок терапияһы бик файҙалы булды булһа кәрәк.
2014 йыл, март.
Новости партнеров