+10 °С
Дождь
Иҫтәлекле көндәр
23 Апреля , 08:05
СТӘРЛЕТАМАҠТАР «ҺӘНӘК»ТӘР МЕНӘН ОСРАШТЫ
«Һәнәк» журналы ижадсылары Стәрлетамаҡ ҡалаһында студенттар, урындағы әҙиптәр һәм журналистар менән осрашты. Ижади сәфәр барышында ҡунаҡтар Өфө фән һәм технологиялар университетының Стәрлетамаҡ филиалында һәм Пионерҙар йортонда булды. Өфө фән һәм технологиялар университетының Стәрлетамаҡ филиалында үткән сарала республиканың билдәле ижадсылары – Башҡортостандың халыҡ яҙыусыһы, «Һәнәк» журналының 1980-2010 йылдарҙағы баш мөхәррире Марсель Сәлимов, журналдың хәҙерге баш мөхәррире, шағир Илгиз Ишбулатов һәм журналдың биҙәлеш мөхәррире, рәссам Артур Василов ҡатнашты.
СТӘРЛЕТАМАҠТАТАР «ҺӘНӘК»ТӘР МЕНӘН ОСРАШТЫ
Осрашыуҙы башҡорт һәм төрки филологияһы факультеты деканы, шағир Айнур Үтәев асты. Ул йәмғиәттәге кире күренештәр менән көрәштә сатира һәм юморҙың роле баһалап бөткөһөҙ булыуын билдәләне.
Илгиз Ишбулатов баҫманың бөгөнгө эшмәкәрлеге һәм киләсәккә пландары менән таныштырҙы. Сатира оҫтаһы Марсель Сәлимов 101 йыллыҡ тарихы булған «Һәнәк»тең данлы үткәненә байҡау яһаны. Экранда күрһәтелгән архив фотолары һәм карикатуралар буласаҡ филологтар өсөн үҙенсәлекле күргәҙмә ҡулланма булды.
Студенттар Марсель Сәлимовтың шиғырҙарын яттан уҡыны, үҙҙәрен ҡыҙыҡһындырған һорауҙарға яуап алды. Журналға яҙылыусыларға рәссам Артур Василов үҙенең һүрәттәрен бүләк итте.
Шул уҡ көндө сатириктар ҡаланың Пионерҙар йортонда бөйөк шағир Ғабдулла Туҡайҙың тыуыуына 140 йыл тулыуға арналған тамашала ҡатнашты.
Марсель Сәлимов Туҡайҙың төрки донъяһында иң тәүге сатириктарҙың береһе булыуын һыҙыҡ өҫтөнә алды. Илгиз Ишбулатов иһә журналдың һуңғы һанында донъя күргән Вәлит Илембәтовтың «Туҡай» шиғырын һөйләп ишеттерҙе.
Фото: https://vk.ru/album-153122170_310762630
СТӘРЛЕТАМАҠТАТАР «ҺӘНӘК»ТӘР МЕНӘН ОСРАШТЫ
Новости партнеров
