+18 °С
Болотло
Бөтә яңылыҡтар
Төрлөһөнән
22 Ғинуар 2022, 12:00

Ишетмәһәң – ишет! Ҡарҙың сифатына ҡыуанайыҡ

Быйыл Өфө ҡалаһына ишелеп яуған ҡарҙың күплегенә ғәжәпләнмәйем. Хәтерем алдамаһа, бындай ҡар йыл һайын ҡаланы күмә һәм ваҡыты еткәс, иреп юҡҡа сыға. Уның ҡарауы, Аллаһы Тәғәлә  биргән ҡарҙың сифатына иғтибар итегеҙ. Ул ап-аҡ, тап-таҙа, хатта, белгестәр билдәләүенсә, быйыл  ҡарҙың үҙендә һыу миҡдары аҙ, йәғни тығыҙлығы ла бик юғары түгел икән. Бындай ҡар көндәр бер аҙ йылынып, көслө генә ел иҫһә, ике-өс көн эсендә елләп, юҡҡа сыға.  Ә инде былтыр йәй һәм көҙҙөң ифрат ҡоро килеүен иҫәпкә алһаҡ, ерҙең үҙендә дымдың юҡлығына зарланһаҡ, быйылғы ҡарҙың беҙҙең үҙебеҙгә лә етмәй ҡалыуы ихтимал.

Ишетмәһәң – ишет!  Ҡарҙың сифатына ҡыуанайыҡ
Ишетмәһәң – ишет! Ҡарҙың сифатына ҡыуанайыҡ

Эйе шул, ҡарҙың күплегенә ғәжәпләнмәйек. Мин шул ҡарға бирешмәгән, күмелеп ҡалмаған, юҡҡа сыҡмаған халыҡҡа һоҡланам. Иғтибар иткәнһегеҙҙер, ғәҙәттә, ишелеп яуған ҡар ял көндәренә тура килә. Ҡар таҙартыусылар дүшәмбе һөйләнә-һөйләнә эш урындарына барып көрәктәренә тотоноуҙарына, халыҡтан ялыуҙар яуа ла башлай. Тегендә тығын, бында бөкө, машиналар төкәшкән, ун баллға еткән транспорт теҙмәһе ҡаланы фалиж хәленә килтергән.

Әйткәндәй, мин Өфөгә ошо быуат башында күсеп килгәндәр иҫәбенәнмен. Иң тәүҙә күҙемә салынғаны, юлдарҙың ике яғында ла өйөлөп ятҡан бысраҡ ҡар һәм шуның өҫтөнән батырҙарса эш урындарына, балалар баҡсаларына, мәктәптәргә ынтылыусы халыҡ, халыҡ һәм халыҡ. Хатта Хөкүмәт ултырыштарында ҡарҙың күплегенә зарланыу хаҡында һүҙ  булғанын  да хәтерләмәйем. Киреһенсә, апрель айҙарында урамдарҙа өйөлөп ятҡан бысраҡ ҡар өйөмөн Еңеү көнөнә, йәғни 9 Майға сығарып бөтөрөп, халыҡты ҡыуандырырға тигән етди саҡырыуҙар яңғырай торғайны, һәм мин уның тормошҡа ашырылғанын иҫләмәйем. Шул осор ҡаланың тышҡы күренеше өсөн яуап биргәндәр алдашырға юл ҡуймаҫ, сөнки һәр районда бер нисә генә грейдер, трактор һәм йөк машинаһы була торғайны.

Хәҙер заман үҙгәрҙе. Коммуналь хужалыҡтар ҡарамағындағы техниканың һәм автотранспорттың күплегенә хайран ҡалырһың. Улар көнө-төнө ҡар таҙартыу һәм сығарыу менән шөғөлләнә. Ә халыҡ һаман зарлана, властарҙы әрләй, ҡулынан килгәнсә ҡар таҙартыуға ҡамасауларға тырыша һәм шәхси автотранспортын ҡайҙа туҡтата, шунда ташлап китә.

Әйткәндәй, бөгөн шәмбе. Күктә бер болот әҫәре юҡ. Яумаһа, ғәжәпләнәсәкмен. Ә һеҙ ҡаланы ҡарҙан таҙартыуға ниндәй өлөш индерҙегеҙ?

 

Рәлиф КИНЙӘБАЕВ

Автор:Ралиф Кинзябаев
Читайте нас: