Янғын
Беҙҙең ауылда янғын сыҡты, бабай менән әбейҙең ғүмер буйы йәшәгән, балалар үҫтергән өйөнән нигеҙе генә тороп ҡалды. Ярай әле, үҙҙәре сығып өлгөргән, хатта ҡайһы бер әйберҙәрен “ҡыҙыл әтәс”тән һаҡлап ҡала алғандар. Уларҙы колхоз бөткәндән бирле бикле торған ҡунаҡханаға урынлаштырҙылар.
Ах та ух килеп әбей ултыра, ҡулында – документтар, алтын-көмөш балдаҡтар, алҡалар, беләҙектәр. Бабайҙыҡында – китап. Ниндәйҙер олимпиадала еңгән өсөн балаларының береһенә бүләк ителгән Һәҙиә Дәүләтшинаның “Ырғыҙ” романы.
Әбейе уның күҙен дә астырмай ороша:
– Өйҙән йүнлерәк берәй әйбер алып сығырға башың етмәнеме ни? Сатлама һыуыҡта яланбаш тороп ҡалдың. Йә инде, тапҡан алып сығыр нәмә! Ҡөрьән булһа, тағы бер хәл.
– Был китап миңә Ҡөрьәндән дә ҡәҙерлерәк. – Бабай китапты юғары күтәрә. – Белмәһәң – бел: бында беҙҙең ата-бабаларыбыҙҙың революцияға тиклем нисек йәшәүҙәре тураһында яҙылған.
Кискә бабай лаяҡыл иҫерек ине. Баҡтиһәң, әбейенән йәшереп ҡара көнгә тип йыйған аҡсаһын ошо китапта һаҡлаған икән.
А. ҒӘЙНУЛЛИН.