Аҡыллылар, зирәктәр ҡайҙа үҫә?

Бына бер заман вәзирҙәр ил буйлап буласаҡ вариҫты эҙләп сығып китә. Бар донъя­ны гиҙеп тә үҙҙәренең талаптарына ярағанды тапмайҙар. Кире әйләнеп ҡайтҡанда юл буйында бәләкәй генә ауылға туҡталып, ял итеп алырға булалар.
Иҫке генә йорт алдында ултырған бер ир баланы күреп:
– Өйҙә берәй өлкән кеше бармы, атайың ҡайҙа? – тип һорай вәзирҙәрҙең береһе.
– Йәшәү сәсә, – тип серле генә яуап биргән малай.
Тегеләр бындай яуапҡа аптырап, яңынан һорай:
– Нисек инде, йәшәүҙе сәсеп буламы ни?
– Баҫыуҙа ул, икмәк сәсә, – тигән малай. – Бына шул уңышты йыйып алғас, беҙгә ҡыш сығырға ризыҡ була.
– Ә-ә-ә. Улай булғас, әсәйеңде саҡыр, – ти икән былар.
– Ул да өйҙә юҡ, бурысҡа күҙ йәше биреп торорға китте, – ти йомаҡлап малай.
Йәнә был һүҙҙәрҙән шаҡ ҡатҡан тегеләр.
– Шуны ла аңламайһығыҙмы ни? Кисә күрше үлеп киткәйне, бөгөн уны ҡайғырып-илап, һуңғы юлға оҙаталар. Донъя булғас, төрлө хәлдәр була, ваҡыты еткәс, улар ҙа беҙгә инер.
Асыҡҡан вәзирҙәр малай­ҙан тамаҡ ялғап алыр өсөн саҡ ҡына булһа ла ризыҡ һәм эсергә йөҙөм шарабы сығарыуын үтенгәндәр.
– Һеҙ тәүҙә аттарығыҙҙы виноград ҡыуағына бәйләп тороғоҙ, йәме, һуңынан һорағанығыҙҙы сығарырмын, – тигән малай.
Вәзирҙәр йорт тирәләй әйләнеп йөрөгән, тик бер ниндәй ҙә виноградҡа оҡшаған үҫемлекте күрмәгән. Былар аптырап, кире өй тупһаһына килгән дә: «Һин ни эшләп беҙҙән булмаған ҡыуаҡты эҙләтәһең», – тигән асыулы тауыш менән.
– Шулай булғас, беҙҙә йөҙөм шарабы ҡайҙан булһын инде?
Тамам баштары ҡатҡан вәзирҙәр бер-береһенә ҡарашып: «Ҡара әле, был малай бигерәк аҡыллы һәм зирәк икән. Батшабыҙға алмашҡа килерлек бына тигән ул буласаҡ», – тип, ниһайәт, эҙләгәндәрен табып, ҡыуанышып ҡайтып киткән, ти.
Ни тиһәң дә, күп таланттар, һәләтлеләр төпкөлдән, ябай халыҡ араһынан сыға ла инде.

https://yanshishma.com/articles/t-rbi-m-kt-be-/2021-07-03/a-yllylar-zir-kt-r-ay-a-2392927

Фото: вконтакте24.рф