Приказ үтәлде!

Бомбалар менән ергә ултырыу ҡәтғи тыйыл­ған. Тыныс халыҡ һәм ғәскәрҙәр зыян күрмәһен өсөн, осоусы уларҙы аэродром янындағы күлгә ташларға ниәтләнә.
Был ваҡытта һөжүм итеүсе авиация полкында армия штабы начальнигы була. Генерал яу­гирҙарҙы бүләкләгәс, комсостав менән өҫтәл артына ултыра. Йәй. Табынды осоу һыҙатынан саҡ ҡына ситтәрәк, асыҡ һауала ойош­­торалар.
Часть – һәйбәттәрҙең береһе, уға үҙ эшенең оҫтаһы майор командалыҡ итә. Полктағыларҙың барыһы ла уға сираттағы звание бирелер тип көтә. Ләкин тикше­реүсе яңы погондар алып кил­мәгән, уның майорҙы ҡапшап ҡарарға теләүе һиҙелеп тора.
Табында тейешле йөҙ грамды ҡоялар, өҫтәлгә таҡы-тоҡо ризыҡ ҡуялар. Генерал ике ҡалаҡ ҡап­ҡас, полк командирына мөрәжә­ғәт итә:
– Нимә, һеҙҙә ашарға концентраттар ғынамы ни?
– Эйе, барыһы ла өйрәнде инде.
– Кешеләр хаҡында яҡшыраҡ хәстәрлек күрергә кәрәк.
– Беҙгә ни килтерәләр, шуны ашайбыҙ, үҙебеҙ таба алмайбыҙ.
– Ана күл, унда балыҡ етерлектер.
Һәм дүрт йөҙ метр алыҫ­лыҡ­тағы күлгә төртөп күрһәтә.
– Бының өсөн беҙҙә кәрәк-яраҡтар ҙа юҡ.
– Кәрәк-яраҡ нимәгә? Һин бомба ташла, бөтә балыҡ өҫкә ҡал­ҡып сығыр.
– Миндә буш кешеләр ҙә юҡ, башҡа мөһим эштәр ҙә етерлек.
– Бәхәсләшмәйбеҙ, майор, быны приказ тип иҫәпләгеҙ, үтәргә тотоноғоҙ, үтәгәс, миңә әйтер­һең.
– Есть! – тигән яуапты ишеткәс, генерал өҫтәл артынан сығып йөҙ грамм ебәрә лә, мотор тауышын ишетеп, башын күтәрә.
Урман артынан «Ил-2» килеп сыға ла, күл өҫтөнән осҡанда бомбалар ташлай. Ике олоғара фонтан һауаға күтәрелә. Шартлау тулҡыны баш кейемдәрен алып осора, кешеләр сүкәйергә мәж­бүр була. Фуражкаһын күтәргәс, штаб начальнигы үҙенә табан атлаусы майорҙы күрә. Бер метр ҡалғас, аныҡ тауыш менән:
– Иптәш генерал, һеҙҙең приказ үтәлде! – ти ул.
Генерал ғәжәпләнеп:
– Маладис, майор, погондары­ңа тишек тиш, – ти. Шунан танау аҫтынан мығырлай: – Һөйләһәң, бер кем дә ышанмаҫ.
Машинаһына ултыра ла китеп бара. Ә полк ике көн буйына Америка консервалары урынына ваҡ, ҡылсыҡлы табан балығы ашарға мәжбүр була.

Факил МЫРҘАҠАЕВ әҙерләне.