+28 °С
Облачно
Төрлөһөнән
23 Января 2024, 07:00
Нисек бәхетле булырға?
Бай ғына бер ханым ярлы йорт эргәһенән үтеп барғанда күңелле көлөшкән тауыштар ишетеп, ялсыһына:– Бар, белеп сыҡ, ниндәй байрам икән уларҙың? – тигән.– Бында урман ҡырҡыусы ғаиләһе йәшәй. Хужа бөгөн утын һатҡан, аҡсаһына бөтәһе лә туйғансы бутҡа ашаған. Шуға шатланалар, – тигән теге.
Нисек бәхетле булырға?
– Ә минең иремдең эштәре хөртәйә генә, – тип күңелһеҙләнгән ханым.
Тиҙҙән уның юлы тағы ла ошо яҡтарға төшкән. Йәнә күңелле көлөшкән тауыштар яңғыраған. Ялсыһы ул йортта ни булғанын белеп килгән:
– Урман ҡырҡыусының улы тыуған! Өс балаһына ашарға етмәй, дүртенсеһенә ҡыуаналар.
– Ә минең ҡыҙҙарым тик мәшәҡәттәр тыуҙыра! – тип йәнә күңелһеҙләнгән ханым.
Өсөнсө тапҡыр был бәләкәй генә йорт эргәһенән үтеп барғанда, көлөшкән тауыштар ишетеп, ул үҙе ишек шаҡыған һәм уларҙың ни өсөн шулай ҡыуаныуҙарын һораған.
– Беҙҙең бөтәһе лә һәйбәт, шуға шатланабыҙ, – тип яуаплаған хужабикә.
Бай ханым, түҙмәйенсә, сихырсыға барған. Урман ҡырҡыусының ғаиләһе тураһында һөйләгән дә:
– Был – ғәҙелһеҙлек! Минең тормошом тик ғазаптарҙан ғына тора, ә уларҙыҡы – тотош ҡыуаныстан, – тигән.
– Һинең байлығың да, ирең дә, аҡыллы ҡыҙҙарың да бар. Тағы ни кәрәк? – тип аптыраған сихырсы.
– Мине бәхетле ит! – тигән ханым.
– Эргәһендә булған бәхетте күрергә теләмәгән кешене мин бер нисек тә бәхетле итә алмайым, – тип көрһөнгән сихырсы.
Зөһрә ҠОТЛОГИЛДИНА.
