Германия бүләге

– Хөрмәтле инәйҙәр! Һеҙгә беҙ буш ҡул менән килмәнек, алыҫ Германия тарафтарынан бүләк алып килдек, – тип теҙеп китте ҡыҙ саф баш­ҡортсалап. – Ҡар­сыҡтарҙың аптырашта ҡалыуын һиҙеп, ул артабан сурытты:
– Инәй, – тип Тимербикә ҡар­сыҡҡа төбәлде,–Паспорт-фәлән документтарығыҙ ғына кәрәк ине бит әле, ҡағыҙҙарҙы тултырыр өсөн...
– Уй аллаҡайым, кем унан бүләк ебәреп ята икән ул?!–Ҡарсыҡ ҡыҙҙың һуңғы һүҙҙәрен ишетмәне, үҙенекен һөйләй бирҙе:
– Ҡарт көнөмдә һуң, эй-й рәх­мәт яуғыры. Ба­лаҡайым йә, күр­һәтә һал һуң,–тип бүләк алып килеүселәр яғына ыңғайланы.
– Миңә лә бармы, ҡыҙым? – тип шатлыҡ тулы йөҙ менән һүҙгә Мәғрүфә ҡарсыҡ ҡушылды.
– Әлбиттә, инәй! Өйөгөҙ ҡайһы тирәлә?
– Бына күршелә генә. Алла ғынам, Тимербикәм, йүгерҙем мин әтеү, ҡайтып өлгөрөр кәрәк,– тип таяғы менән алпан толпан йүгерә-атланы күрше ҡарсыҡ.
– Тимербикә инәй, эштәр былайыраҡ ине бит әле,– тип ҡыҙ егеткә ымланы. Уныһы юғалып ҡалды, тотлоғоп:
– Инәй, бына беҙгә бары тик, әҙерәк... Алты мең һум аҡса ғына бына... “Аңра, нимә һөйләнәң?” тигәндәй ҡыҙ уға йәмһеҙ ҡараш ташланы.
– Почта аша килгәстән, ара ла йыраҡ булғас, саҡ ҡына түләргә ине шул,– тине ҡыҙара биреп ҡыҙ.
– Бәй-й, балаҡайҙарым. Нисек инде түләргә тей ул, бүләкте түләп алалармы ни хәҙер?
– Аңлатып торам бит, почта өсөн түләргә кәрәк,–асыуы кө­сәйҙе ҡыҙҙың. Шулай ҙа йыл­майырға тырышып:
– Пенсияны алып тораһы­ғыҙ...Моғайын да, алты мең генә табырһығыҙ. Көн һайын Германия һынлы Германиянан бүләк ебә­реп ят­майҙар, шулай бит? Тимер­би­кә ҡарсыҡ юға­лып ҡал­ды, икеләнде:
– Юҡ, балалар, булдырып бул­маҫ ул. Аҡсам бөтөп китте, пенсия көнөн һанап ултырам үҙем.
– Бәлки, күрше-кү­лән­дәре­геҙ биреп тора алыр? – Егет аяҡ үрә баҫып һүҙгә килде.
– Юҡ-юҡ, һикһә­немә етеп һо­ранып йөрөмәҫ­мен инде, юҡ,– ҡарсыҡтың яуабы ҡәтғи булды.
Ыңғай яуап алма­ғас, егет ме­нән ҡыҙ һикере­шеп тороп, сы­ғып китеү яғын ҡа­рай башланылар.
Баҡһаң, был йәш­тәр, “Германия бүлә­ге” тип, ҡарт-ҡоралар­ҙан аҡса һу­рып йө­рөүсе енә­йәтселәр булып сыҡҡан. Бер бәлә­кәй генә ауылда, бер-ике сәғәттә биш­лә­гән оло кешегә “бү­ләк”тәрен биреп сы­ғып өл­гөр­гәндәр ҙә инде...

Диана ХӘБИБУЛЛИНА.