+17 °С
Облачно
Ғәләмәт бит
14 Февраля 2023, 11:00
Мөхәббәтле йорт
Ысын мөхәббәт бар ул, егеттәр, бар! Беҙҙең ауылға былтыр уҡытырға килгән Гөләндәм менән лесничий Ҡәүи араһында шундайын мөхәббәт дөрләп китте – ундайҙы бер китапта ла уҡығаным, бер кинола ла күргәнем юҡ әле. Бер-береһенән һөйөү тулы ҡараштарын да алмай, етәкләшеп кенә йөрөйҙәр, әйгенәм.
Мөхәббәтле йорт
Мөхәббәт тау ҙа аҡтарта, диңгеҙ ҙә кистерә, ти. Ҡәүи диңгеҙ кисеп йөрөмәне, буғай, тау аҡтарыу түгел, уға үрмәләгәнен дә күрмәнем. Шулай ҙа егетлеген күрһәтте – Гөләндәмгә өйлөк ағас бүләк итте. Тура килһә килә бит – ағас тейәгән “КаМАЗ”дар ҡәҙерле йөктәрен бушатып та китте, мөхәббәттең ҡайнар ялҡыны һүрелә лә башланы.
Күп тә үтмәй, Гөләндәм менән ауылдың иң данлыҡлы балта оҫтаһы Кәбир араһында ҡупҡан һөйөү усағы бөтә донъяны йылытырлыҡ ҡайнарлыҡта дөрләп китте. Кәбир үҙенең бригадаһы менән хәтәр ҙур бураның һуңғы рәттәрен һалғансы дауам итте ул.
Бер аҙҙан үҙ пилорамаһында көн-төн таҡта ярҙырып һатҡан Ғәлимйән, район үҙәгендә пластик тәҙрәләр менән сауҙа иткән Вафир, электрик Сәғәҙәт, “Газель” йөк машинаһы булған Мәрүән дә алмашлап мөхәббәт даръяһына сумып-сумып алды. Шуныһы ҡыҙыҡ – һәр береһе көсөнән, дарманынан килгәнсе әлеге йортто төҙөүгә үҙ өлөшөн индерҙе.
Гөләндәмдең йорто ауылыбыҙҙың биҙәге хәҙер. Туй күлдәге кейгән ҡыҙ кеүек барыһын да матурлығы менән һоҡландыра. Шулай булмай, баҡса йә аҡса емеше түгел, мөхәббәт емеше бит ул!
Марат Әминев.
Фото: b17.ru
