+23 °С
Дождь
Ғәләмәт бит
14 Февраля 2023, 05:00
Мәшәй юбилейы
Мәшәй үҙенең 50 йәшен бөтә республика кимәлендә уҙғарырға теләп, бик ҙур пландар ҡора. Алдан уҡ кем ниндәй бүләк алырға, нисә кешелек табын әҙерләргә тейешлеген тәғәйенләп, ҡаланан-ҡалаға, ауылдан-ауылға йөрөп, ойоштороу эштәре алып бара. Ул гел генә яҙыусылар араһында буталып йөрөгәс, был үҙе лә ҙур яҙыусы икән, тип уйлайҙар. Реклама көслө нәмә бит.
Мәшәй юбилейы
Ғинуар айында үткәрелә башлаған юбилейын төбәк һайын уҙғарып йөрөй торғас, йәй ҙә килеп етә. Ауыл халҡының ҡыҙыу эш мәле. Өҫтәүенә, Мәшәй Мәшәевичтың тәғәйенләнгән юбилейын үткәрергә ҡайҙандыр аҡса табырға кәрәк. Клуб алдында эленеп торған ҙур иғландағы портреты күптән инде тишерҙәй булып ауыл хакимиәтенең бинаһына ҡарап тора бит.
Берҙән-бер көндө Өфөнән килгән оло түрә, был ауылдан уҙып барышлай, иғланды күреп ҡала ла үҙенең ярҙамсыһына:
– Нимә, был маҡтансыҡ малай юбилейын ҡыш Өфөлә бик киң итеп үткәргәйне, хәҙер йыл буйына халыҡты мәшәҡәтләп, шапырынып йөрөймө инде? Уттай ҡыҙыу ураҡ мәлендә ниндәй юбилей, срочно отменить! – тип бойороҡ бирә.
Шунан алып Мәшәй юбилейын ғына түгел, хатта тыуған көнөнөң ҡасан икәнен онотҡан, имеш.
Юбилей уҙғарып, бүләк йыйырға яратҡан эшем эйәләренән хәҙер:
– Һин нимә, Мәшәй һымаҡ булғың киләме? – тип көлөп ҡуялар.
Д. ДӘМИНОВ.
