Ендәр оялаған йорт

Сырҡ-сырҡ килгән тауыштар көсәйеп, бер заман келәгә эленгән ишегебеҙ шар асылып китте лә, "шарт" итеп ябылды. Атай менән әсәй һикереп килеп торҙо, ҡустым да уянды. Ендәр мөрйәнән килеп инә лә, ишекте асып сығып юғала, шунан ҡабат мөрйәнән килеп инә! Өй эсе геү килеп тора. Минең сәс үрә торҙо, ҡурҡыуҙан ҡысҡыра башланым. Миңә ҡустым ҡушылды. Уның ҡайһы арала урындыҡҡа килеп етеүен, әсәйемә һыйыныуын аңғармай ҡалдым, сөнки әсәйем минең башымдан ҡосаҡлағайны. Икебеҙҙе ике яҡтан ҡосаҡлаған әсәйем үҙе лә нимәлер тип ҡысҡырҙы. Атайым бер һикереүҙә мылтыҡты сөйҙән алып, ишек яғына атып ебәрҙе. Тоҙло-боросло һүҙҙәрҙе ҡушып, ҡаты итеп һүгенде. Шунан шәмде тоҡандырҙы ла, яныбыҙға килеп ултырып, мине ҡосаҡланы. Таң атҡансы күҙ ҙә йомманыҡ, ҡустым ғына бер аҙҙан йоҡлап китте. Әсәйем, башҡа был йортта бер сәғәткә лә ҡалмайым, тип илағас, атай менән бергә эйәртенешеп, өй аша йәшәгән бабайға барҙыҡ. Төнгө мәхшәрҙе һөйләгәс, уның башын тырнап торғаны һаман күҙ алдында: "Былай уҡтыр тип уйламағайным..." Ул яңғыҙ йәшәгән бер тол ҡатынға беҙҙе алып барҙы, хәлде аңлатып биргәс, ул беҙҙе үҙендә йәшәтергә ризалашты. Шулай итеп уның ике бүлмәле йортонда өйҙәш йәшәнек. Ә теге ҡурҡыныс өйгә яҡын да барырға ҡурҡтым. Әйберҙәрҙе атайым менән әсәйем ҡурҡа-ҡурҡа үҙҙәре ташыны. Һуңынан йыш ҡына, был ниндәй ғәләмәт булды һуң әле, тип аптырашып баш сайҡап ултыра торғайнылар. Быға ниндәйҙер аңлатыу булырға тейеш тә инде, тип атайым күпме китап уҡыны, осона сығырға тырышты, әммә бер нисек тә аңлай алманы. Мин шул төндән һуң тотлоғоп ҡалып, ҡустым бәүелен тота алмай оҙаҡ яфаландыҡ. Ҡурҡыуыбыҙ көслө ине шулай. Әле лә тулҡынланһам тотлоғам. Әсәйемде ситкә шылдырып, ун бер йәшемә ҡәҙәр атайым янында йоҡлап йөрөнөм, йәнәһе лә, ир затынан ендәр ҡурҡа, теймәй, тип. Күпме йыл үтһә лә, ул иҫке йорттағы төн кисә генә булған кеүек, кисерештәр саҡ ҡына тоноҡланған.

- Һеҙ мине төнгә ҡарай ҡурҡытмағыҙ әле, - кинәт өшөп, апайға инәлдем. - Хәҙер төшкә инһә...

- Ҡурҡытырға уйымда ла юҡ, һеңлем, элек ендәрҙең күп булғанын ғына әйтәм. Хәҙер әллә ни ишетелмәйҙәр ҙә ул, - апай төкөрөнөп ҡуйҙы. - Ә шулай ҙа, һаҡланғанды Хоҙай ҙа һаҡлар, тип, берәй доға ятлап ҡуйыуың артыҡ булмаҫ.

 Әле шуға "Аятел көрси" доғаһын уҡып ултырам.   

Фото: асыҡ сығанаҡтарҙан.