Бурҙан ҡала, һыуҙан ҡалмай

Тап шул мәлдә юғалып ҡалмаған тиҫтәнән ашыу ир-егет олоғайған кешеләрҙе, инвалидтарҙы, балаларҙы үҙ транспортында һәм үҙ елкәләрендә хәүефһеҙ урынға сығарҙы. Бына хәҙер былай ҙа етеш йәшәмәгән халыҡ ташҡын эҙемтәләрен бөтөрөү, күрелгән зыянды ҡаплау өсөн байтаҡ ваҡыт көс һалыр әле. Әйткәндәй, журналыбыҙҙы алдырып уҡыусыбыҙ һыу ярҙарынан сыға башлағас та, атаһының әйткәнен тыңлап, малын өҫкө урамда йәшәгән туғандарына ҡыуа, еңел машинаһын да шунда алып бара. Тап шуға күрә сағыштырмаса ҙур зыян күрмәй. Ә бына күрше-күләне уның әйҙүкләүенә ҡолаҡ та һалмай, хәҙер терһәктәрен тешләрҙәй булалар ҙа, һуң инде.
Быйылғы ташҡында 25 районда алтмышлап һыу баҫыу осрағы теркәлде.
Ярҙамға килергә тейешле хеҙмәттәр ҡайҙа булған, ниңә боҙҙарҙы шартлатмағандар, тығылыуын көткәндәр, тип һорар ғәҙеллек даулаусы уҡыусы. Күрәһең, бер юлы бөтә йылғаларҙы берҙәй үк контролдә тотоу мөмкин булмаған эштер. Хәйер, беҙ ташҡын урынында эшләйбеҙ, тип фотоларын интернетҡа ҡуйыусыларҙың күплегенә ҡарағанда, ярҙам итеүселәр байтаҡ.
Законға ярашлы рәүештә, һыу баҫыу сәбәпле мөлкәтенән тулыһынса ҡолаҡ ҡағыусыларға 100 мең һум, өлөшләтә зыян күреүселәргә 50, йорттары һыу баҫҡан зонала ҡалыусылар 10 мең һум дәүләт ярҙамына өмөт итә ала. Әлбиттә, был бик әҙ. Шуға күрә ташҡындан зыян күреүселәргә ярҙам ҡулы һуҙыусыларға рәхмәт һүҙҙәре генә еткерге килә. Изгелек акцияһына “Һәнәк”тәр ҙә ҡушылды.
Эйе, беҙҙә барыһы ла һис тә көтмәгәндә килә. Аптыратып, йәйен урмандар яна, ҡышын ҡар күп итеп яуа, яҙын ташҡын ярҙарынан сыға. Тәбиғәт ҡазалары йыл һайын ҡабатланып торһа ла, уларҙы әҙерлекһеҙ килеш ҡаршылайбыҙ. Хоҙай беҙҙе уйлай, әммә ул беҙҙең өсөн уйламай шул.

Кәкре БӨКРИЕВ.