-33 °С
Ясна
75 лет Победы
“ҺӘНӘК”кә яҙыл һәм бүләкле бул!
Бөтә яңылыҡтар

Биҙәк

Улар ресторанда осрашты.– Чао!– Чао!Һүҙ эйәрә һүҙ сыҡты, һүҙ артынан күҙ сыҡты, тигәндәй, тиҙ арала былар төп мәсьәләгә күсте.

Биҙәк
Биҙәк

– Йәш ғүмеребеҙҙе ниңә заяға үткәрәбеҙ әле! – тине Рөстәм, Зиләнең ялҡынлы күҙҙәренә ҡарап. – Әйҙә, өйләнешәбеҙ!
– Беҙ кемдән кәм? – тип шунда уҡ ризалашты Зилә. – Ҡасан яҙылы­шабыҙ?
– Ниңә ҡасанға ҡалдырырға! Ҡалған эшкә ҡар яуа, ти. Әйҙә, хәҙер үк!
– Хәҙер үк икән – хәҙер үк!
Шулай итеп, уйламағанда-нитмәгән­дә генә өр-яңы йәш ғаилә шытып сыҡты. Тик бер ай самаһы ваҡыт үтте­ме-юҡмы, Зилә – Рөстәмдән, Рөстәм Зиләнән биҙеп тә өлгөрҙө.
– Атайың вәғәҙә иткән маши­наһын биреү менән айырылам! – тине Зилә.
– Әсәйең үлеп, унан ҡалған ике бүлмәле фатирҙы үҙ исемеңә күсерткән көнөңдә үк судҡа ғариза яҙам! – тине Рөстәм.
Көндәр, айҙар, йылдар үтте… Алма кеүек ике бала тыуҙы. Рөстәм менән Зилә әле һаман эт менән бесәй һымаҡ бер-береһенә ырылдап-мырылдап йәшәүен дауам итә. Шул уҡ ваҡытта был ғаилә ҡайҙалыр имен йәшәүсе ныҡлы йәш ғаиләләр исемлеген биҙәп тора.
Әле кисә генә, бер хәбәрсе килеп, үҙҙәренән интервью алды.
– Саф мөхәббәткә ҡоролған татыу ғаилә кеше ғүмеренең сағыу биҙәге! – тип тамамланы Рөстәм һүҙен.
– Ниндәйҙер иҫәптән сығып әүмәлән­гән ғаилә кешене мәңгегә бәхетһеҙ итә! – тип өҫтәне уға Зилә.
Хәбәрсе уларға оҙайлы ғаилә бәхете теләп, ҡәнәғәт булып ҡайтып китте.
Вәғәҙә ителгән машина ла, ике бүлмәле фатир ҙа һаман алынмағайны әле…

Рәйес ҒАБДРАХМАНОВ.

Автор:"ҺӘНӘК" журналы
Читайте нас в