Мөхәббәт һынауы аша

Дө­йөм­ләп әйт­кән­дә, һәр кемде төрлө һы­науҙарға дусар итә торған илаһи көс. Билдәле, ғишыҡ утында яныусыларҙың был ваҡытта холҡо ла үҙгәрә, аңы ла томаланып тора. Нәҡ шул ваҡытта бер ҡоҙасам менән булған ваҡиғаны һеҙгә еткермәк­семен.
Бынан байтаҡ йылдар элек әле миңә ҡоҙаса ла булмаған Ғафури ҡыҙы Нурия, әле ҡоҙа булырға ла өлгөрмәгән яҡташ егет Ислам баш ҡалабыҙҙағы Салауат һәй­кәле янында таныша. Улар ти­мерҙе ҡыҙыуында һуҡмайын­са, бер-береһен иләк аша үткәр­гәндән һуң ғына сәстәрен сәскә бәйләргә хәл итә.
Уҡыуын тамамлап, район үҙә­генә эшкә ҡайтҡан егет оҙаҡ­ламай ата-әсәләре менән таныштырыу өсөн һөйгәнен үҙҙәренә саҡыра. Әлбиттә, ҡанатланған ҡыҙ юлға ашҡына. Ниһайәт, Сибай самолетына улты­рырға саҡы­ралар. Башын төрлө уйҙар солғап алған ҡыҙ ҙа билетын тотоп само­летҡа инеп урынлаша. Тулҡын­ланыуы көсәйә, ә ваҡыт бик яй үтә. Һөйләшелһә лә Сибайҙа егете ҡаршы алырмы, ул тағы нин­дәй Монголияла йәшәй икән, өҫ­тәүенә, шул тирәлә үк Голливуд та, Шанхай ҙа барлығын ишетеп аптырағайны. Ҡайҙан хасил булды икән улары, тип уйҙарға сумып ултырғанда имен-һау ергә килеп төшәләр. Ҡаршы алыусылар ара­һында егетен байҡау өсөн иллю­минаторға күҙ баҡһа, ышанырһыңмы-юҡмы, ундағы “Нефтекамск” яҙыуын күреп иҫен юғалта яҙа. Нимә эшләргә белмәй иҫәңгерәп ултырғанда эргә­һенә килгән пилот менән стюар­дессаға хәлен саҡ аңлата ала. Шул уҡ самолетта кире Өфөгә оса. Унда Сибайға яңынан билет алырға кас­саға барһа, аҙна буйына билеттар һатылып бөткән булып сыға. Мө­хәб­бәткә кәртә юҡ тиелһә лә, булғылай икән шул. Ҡыҙ аэропорттан сығып илап торғанда янына пилот кейе­мен­дәге ағай килеп баҫа: “Һең­лекәш, нимә булды, ниңә күҙ йәш­тәрең­де түгәһең?” (Ул аэропорт начальнигы булған). Ниндәй мажа­раларға юлығыуын һөйләп биргәс тә ағай кеше: “Изге юлдаһың, ҡы­ҙыҡай, ярҙам итмәй бул­маҫ”, – тип ҡулындағы билетын алып инеп китә һәм бер аҙҙан: “Си­байға икенсе рейс осорға йыйына, йүгер!” – тип билетын тотто­ра.
Шулай итеп, бер көндә бер билет менән өс мәртәбә һауаға кү­тәрелгән ҡыҙ урау-урау юлдар үтеп булһа ла (ә теге самолетҡа яңылыш ултыртып ебәргән ҡыҙ­ҙар­ҙың да мөхәббәт утында янған осоро булғандыр, тигән фекерҙә ҡалайыҡ), имен-һау Сибайға килеп төшә. Шикләнеп кенә иллю­ми­наторға ҡараһа, һөйгәненең яңғыҙ ғына баҫып торғанын кү­реп, тағы күҙҙәренә йәш ала. Тик былары шатлыҡ, бәхет йәштәре була.
Артабан йәштәр өлгөлө тормош көтә, тәрбиәле балалар үҫтерә, бөгөн хаҡлы ялдалар. Тик ҡоҙа­сам башҡаса самолетҡа ултырманы, мөхәббәт шаяртыуы ла еткәндер...

Фәрит РӘМОВ.