Төш һәм эш

Диспансеризация тиҙәрме шунда. Совет заманынан уҡ килгән тәртибе шулай. Быйыл да Һәр­мәев әфәндегә саҡырыу ебәр­ҙеләр.

– Сәләмәтлегегеҙҙе тикшерер­гә кәрәк, – тине табип. – Бор­сол­мағыҙ, был юлы оҙаҡ тотҡар­ламабыҙ. Пациенттарҙы, япун аппараты ярҙамында, конвейер ысулы менән хеҙмәтләндереүгә күстек бит хәҙер. Әүәлгесә бүл­мә­нән бүлмәгә әлһерәп йөрөйһө түгел, ун минутта – бөттө-китте, вәссәләм!
– Хуплайым! – тине Һәрмәев. – Күптән ваҡыт!
– Сисенегеҙ ҙә, бынауы быяла мискәгә инеп ятығыҙ. Ҡалғаны – беҙҙең эш.
Һәрмәев ҡыҫтатып торманы.
– Һеҙ мине аңламанығыҙ, – табип, тегенең ҙур башлыҡ икәнле­ген һис кенә лә иҫенән сығармай, йомшаҡ ҡына шелтәләп алды. – Сыр яланғас сисенегеҙ. Хатта күҙлегегеҙҙе лә һалығыҙ.
– Уңайһыҙ бит. Йәнәштәге быяла мискәлә ҡатын-ҡыҙ тура килһә?
– Хафаланмағыҙ! – Табип уны йыуатырға ашыҡты. – Һеҙҙең арттан юл хәрәкәте именлеге инспекторы Юлбаҫаровты һаласаҡ­быҙ.
Һәрмәев, тынысланып, күрһәт­кән урынға инеп ятты. Конвейер яй ғына ҡуҙғалып китте. Быяла мискә, стеналағы уйымды үтеп, күрше бүлмәлә пәйҙә булды.
– Йә, һөйләп ебәрегеҙ, ниндәй зарҙарығыҙ бар? – тине уны көтөп торған терапевт.
– Зарҙар байтаҡ инде ул, – тип яуап бирҙе Һәрмәев. – Хәлдәр көндән-көн ауырлаша. Тын да алып булмай...
– Диңгеҙ буйына барырға кәрәк, унда һауа саф.
– Кисә генә Багамиҙан ҡайт­тым. Ул турала әйтмәйем. Эйе, тын да алырлыҡ түгел. Бер яҡлап өҫтән өтәләр – конкрет эш талап итәләр, икенсе яҡлап аҫтан ҡы­ҫалар – теге ни... халыҡ шаулаша. Демократия бит хәҙер. Хөртәйҙе хәлдәр.
– Үтер, үтер, борсолмағыҙ, – тип йыуатты табип.
Уғаса булмай, быяла мискә өсөнсө бүлмәгә килеп инде. Быныһында ҡолаҡ-тамаҡ-танау табибы ултыра, имеш. Ул да дә­рә­­жәле башлыҡтың хәлен һо­рашты.
– Танауға зарым юҡ, – тине Һәр­мәев. – Сәйәси елдең ҡайһы яҡтан иҫеүен тиҙ һиҙә былай. Тамаҡ та, Аллаға шөкөр, ябай хеҙмәткәрҙәргә екергәндә тауыш арыу уҡ яңғырай. Тик бына ҡолаҡ... Түҙеп булмай һис тә. Ҡолаҡ итемде сәйнәй бисә иртә лә кис тә.
– Ниңә?
– Башҡа башлыҡтар сит илдә биш ҡатлы особняк һатып ала, яхтала елдерә, ти. Һин ҡала си­тен­дәге ике ҡатлы дачаңа ҡарап ятаһың, ти. Машинаңды ташҡа үлсәйем, “Мерседес-бенц” та булдымы машина, ти. Бөгөн генә тотҡан леопард тиреһенән тун талап итә. Тағы әллә нәмәләр һорай...
Һәрмәев ҡатынының каприздарын һөйләп бөтөрә алманы, быяла мискә дүртенсе бүлмәгә килеп инде. Быныһында кардиолог, йәғни йөрәк табибы көтә, имеш.
– Йә, йөрәк серҙәрегеҙҙе һөй­ләп ебәрегеҙ, – тине уныһы.
Һәрмәев, үҙе лә һиҙмәҫтән, ҡатынынан туйыуын, алмашлап-алмашлап һөйәркәләренә йөрө­үен, хатта сит илдә лә бер кән­тә­йе булыуын әйтеп һалды.
Бишенсе бүлмәлә уны хирург ҡаршы алды.
– Ҡайһы ҡулығыҙ менән риш­үәт алаһығыҙ? – тип төпсөн­дө бы­ныһы, салғы бысағын сарлай-сарлай.
– Уныһы – минең эш! Ҡыҫыл­ма! – тип ыҫылданы Һәрмәев.
– Юҡ инде, ришүәт алған ҡулы­ғыҙҙы ҡырҡып ырғытабыҙ хәҙер! Коррупционерҙарҙы шун­һыҙ бөтөрөп булмаясаҡ, – тип, хирург быяла мискә ҡапҡасын аса башланы...
– А-а-а! – Шул саҡ Һәрмәев, шыбыр тиргә батып, уянып китте.
“Канар утрауҙарына барып, нервыларҙы нығытып ҡайтмай булмаҫ, ахыры, төшкә әллә нә­мәләр инә башланы”, – тигән ҡарарға килде ул һәм урынба­ҫарына шылтыратты:
– Ҡара әле, Йолҡобаев, теге ки­сә ер теләнеп килгән бизнесменды нисек тә һығырға тырыш, миңә йомарт спонсор кәрәк буласаҡ...

Сәүбән ШИФАҒОЛОВ.