+30 °С
Болотло
Йөҙ йыллыҡты ҡаршылап...
22 Август 2025, 07:10
Леонид СОКОЛОВ
Леонид Алексеевич Соколов (1953 йылдың 8 июле) — Өфө ҡалаһында тыуған. Яҙыусы-сатирик, тәржемәсе. Рәсәй, халыҡ-ара әҙәби конкурстар лауреаты. “Һәнәк” журналының даими авторы. Башҡортостан Республикаһының атҡаҙанған мәҙәниәт хеҙмәткәре, «Клуб 12 стульев» ойошмаһының «Золотой телёнок» премияһы лауреаты. ШИКЛЕ ӘҘӘМ Әкрен генә ишек шаҡынылар. Асһам, ҡулына бәләкәй сумаҙан тотҡан, ыҫпай ғына кейенгән таныш түгел егет тора.– Һаумыһығыҙ! – тине егет итәғәтле генә. – Мин крандарҙы төҙәтергә килдем.– Улай икән, – мин әйтәм. – Кисә генә ЖЭК-кә хәбәр иткәйнем, бөгөн килеп тә еттегеҙ инде, улайһа? Ә мин, дөрөҫөн әйткәндә, берәй ай үтер әле, тип уйлағайным. Ә һеҙ...– Һм-м-м... Ниңә мин бер айҙан һуң ғына килергә тейеш әле?
Леонид СОКОЛОВ
– Ниңә, тип ни... – Бер килке һүҙ тапмай торҙом. – Эшегеҙ былай ҙа муйындандыр, тим.
– Шөкөр, бөтәһенә лә өлгөрәбеҙ.
– Эйе, эйе, – тип яуаплайым тегеңә, ә үҙем ни өсөндөр шөрләйем. Был ни хәл, тип уйлайым егеткә ҡарап. Өҫтөндә театрға йөрөй торған матур костюм, ҡулында ипле генә сумаҙан. Ана, Миша ағай килә ине элек. Кейеме тотошо менән брезенттан була торғайны. Кеҫәләре тулы шөрөп, гайка һәм шуның ише тимер-томор ине. Юҡ, был бер ҙә эшкингән егеткә оҡшамаған. Крандарҙы төҙәтәм, бөтөнләй боҙоп ташламаһа ярай ҙа һуң. Туҡта, тим эстән генә, әҙерәк үҙен һынап ҡарайым.
– Эшкә тотонғансы, – мин әйтәм, – әллә теге, ниме?.. Һыуытҡыста – бына тигән закуска...
Был йүнһеҙ баш һелкә, кәрәкмәй, йәнәһе.
– Рәхмәт, – тигән була, – эштә бит мин. Тағы ике-өс урынға бараһым бар.
– Кухняға үтеп, сумаҙанынан асҡыс-маҙар сығарҙы ла, крандарҙы борғоларға ла тотондо. Тегеләй итте, былай, тигәндәй. Бер мәл:
– Булды, – ти был.
– Бик тиҙ зәбаһа!
Хатта ышанғы килмәй. Кранды бер асам, бер ябам Был ни ғәжәп – һәйбәт! Егет иһә, сумаҙанын ҡулына алып, китергә лә йыйына башланы.
– Ярай, хушығыҙ! – ти. – Әгәр йомошоғоҙ төшһә, саҡырырһығыҙ.
Ул китте. Ә мин өслөктө ҡулыма услап тотҡан килеш торҙом да ҡалдым. Мастер булһа, моғайын, үҙе үк һиҙҙерер ине. Был берәй мөртәттер, күрәһең. Документтарын тикшерәһе ҡалған. Хәйер, милицияға хәбәр итергә әле лә һуң түгел. Мин телефонда ашыға-ашыға 02-не йыйҙым.
№5, март, 1980 йыл.
