+30 °С
Болотло
Йөҙ йыллыҡты ҡаршылап...
25 Август 2025, 13:27
Рәми ҒАРИПОВ
Ғарипов Рәми Йәғәфәр улы (1932 йыл 12 феврале — 1977 йылдың 20 феврале) — хәҙерге Салауат районы Арҡауыл ауылында тыуған. Шағир, журналист, тәржемәсе. “Һәнәк” журналы менән даими хеҙмәттәшлек иткән. Башҡортостандың халыҡ шағиры.
Рәми ҒАРИПОВ
Ғәҙәт
Яратты ул түрәлекте,
Белде түрәлек тәмен.
Түрә булыуҙа күрҙе ул
Йәшәүҙең бөтә йәмен.
Көн һайын ул кешеләргә
Әмер яҙҙы ҡоромдан:
Береһен алды, береһен ҡуйҙы
Алыштырып урындан.
Бер көн килеп ул үҙе лә
Төшөрөлдө түбәнгә.
Тик ғәҙәте тороп ҡалды,
Нишләйһең һуң – өйрәнгән!..
Бүлмәһендә яңғыҙ ҡалһа,
Әмер яҙа ҡоромдан:
Ултырғыстарын булһа ла
Алмаштыра урындан!
“Һәнәк”, 1962 йыл.
Иңкеш
Һары, ҡара, аҡ буй төҫлө, йөнтәҫ
Иңкеш килеп инде бүлмәмә,
Килеп инде лә ул хужа булды.
Геүләй!..
– Етер, – тимен, – геүләмә!
Әллә ниндәй эшем эйәһеме,
Ураңҡылап йөрөй һәр ҡайҙа.
Үрле-түрле йөрөп,
Һаман геүләй!..
Геүләүенән ләкин ни файҙа?
Ә шулай ҙа геүләй,
Тына белмәй,
Ни тиһәң дә, ҡәһәр, уға аҙ.
Түгелме был, әҙер балды йыйып,
Күкрәк һуғып йөрөр бушбоғаҙ?..
1963 йыл.
Рәми ҒАРИПОВ
