+28 °С
Облачно
Йөҙ йыллыҡты ҡаршылап...
16 Сентября 2025, 07:05
Йөҙ йәшә, йөҙөп эшлә!
Ғәйнан ӘМИРИ Эй, ғүмер тигәндәрең, Һәнәк ҡорҙаш, ағым һыуҙар шикелле, үтә лә тора. Мин бит һинең тыуған көнөңдө хәтерләйем. Ә бына ярты быуат үткән дә киткән...Хәҙер инде һин, бәлки, үҙең дә онотҡандырһыңдыр, хәтереңә төшөрәйем: һиңә исем ҡушҡан кеше бөйөк Мәжит Ғафури үҙе бит.– Юҡ, юҡ, – тине халыҡ шағиры, – Шөпшә лә, Һағыҙаҡ та түгел. Улар саға ла китә. Эше бөтә. Һәнәк булһын! Һәнәк ул сәнсеп йәки сағып ҡына ҡалмай, ә йәптәре менән эләктереп ала ла ситкә ырғыта – сүплеккәме унда, тарих баҙынамы. Беҙгә нәҡ шундай сатира кәрәк!” Бына шулай донъяға килдең һин, Һәнәк дуҫ! Өмөттәрҙе аҡланың… «Һәнәк», 1975, 19-сы һан.
Йөҙ йәшә, йөҙөп эшлә!
ШӘЙЕХЗАДА БАБИЧ
Башҡорт әҙәбиәтендә ул
Бөйөк бер табыш булды.
“Һәнәк” журналының да бит
Атаһы Бабич булды.
ҒАРИФ ҒҮМӘР
Ғ. Миәкинский ҙа ул,
Ғ. Шут та – ул, Ғ Юлай.
Ғариф Ғүмәр йәмһеҙлектең
Кәрәген бирҙе шулай.
ӘНҒӘМ АТНАБАЕВ
Ыжлап та бирмәҫ ине ул
Ҡалмаһа ла бер тәғәм.
Әллә юморһыҙ бер көн дә
Йәшәй алманы Әнғәм.
ИМАЙ НАСЫРИ
Ул халыҡтың дуҫы ине,
Көлөп йәшәне Имай.
Уның яҙғандарын уҡып,
Йә әле, һин дә йылмай.
МАРАТ КӘРИМОВ
Көлмәгән кеше ҡалманы
Уның эшенә ҡарап,
“Һәнәк”те етеҙ ҡулында
Уйната ғына Марат.
НАЗАР НӘЖМИ
Оҙаҡ йылдар күтәрҙе ул
Сатирабыҙ баҙарын.
“Һәнәк” һағынып иҫкә ала
Шаян телле Назарын.
МАР. СӘЛИМ
Төрлө әтрәгәләмдәрҙең
Бөтөрҙө тамам хәлен.
Элеп алды, һелкеп һалды
“Һәнәк” менән Мар. Сәлим.
2010 йыл, октябрь.
