Наил ҒӘЙЕТБАЙ

И р. Беҙ кисә яңы закон ҡабул  иттек. Бөгөндән башлап рөхсәт ҡағыҙын бер айға ғына бирергә. Кем айҙан ашыу рөхсәт ҡағыҙһыҙ эшләй – штраф! Йөҙ мең һум!

Ҡ а т ы н. Йөҙ мең?! Хәҙер миңә лә штрафмы?

И р. Һин ике көн рөхсәт ҡағыҙһыҙ эшләйһең.

Ҡ а т ы н. Мин бит белмәнем һеҙҙең законды.

И р. Законды белмәү яуаплылыҡтан ҡотҡармай. Бына квитанция. Бөгөн үк түлә.

Ҡ а т ы н. Был бит ғәҙелһеҙлек! Ниңә йәшереп ундай закон сығараһығыҙ?

И р. Закондар һәр саҡ йәшерен эшләнә. Штраф һалыу өсөн. Бюджет сатнай бит, ҡәҙерлем, бюджет. Мә, тот!

Ҡ а т ы н. Йөҙ мең штраф! Мин уны ҡайҙан алайым!

И р. Һеңлем, аңла, бюджет аҡса һорай.

Ҡ а т ы н. Туҡта, ағай. Ул штрафты берәй нисек түләмәҫкә буламы?

И р. Бына был конструктив фекер. Булмай!

Ҡ а т ы н. Их! Ни эшләргә! Йөҙ мең!

И р. Хәйер, бер юлы бар.

Ҡ а т ы н. Бармы? Әйтегеҙ тиҙерәк.

И р. Әйтә алмайым.

Ҡ а т ы н. Ниңә?

И р. Бында тыңлаусы аппараттар бар. ФСБ тыңлап ултыра.

Ҡ а т ы н. Юҡ бында бер ниндәй ҙә аппарат. Әйтегеҙ.

И р. Һин белмәйһең, һеңлем. Һәр фатирҙы тыңлайҙар. Мин ФСБ-ны яратам!

Ҡ а т ы н. Ҡолағыма әйтегеҙ... Нимә? Нимә тинегеҙ! Ҡысҡырыбыраҡ әйтегеҙ, ишетмәйем.

Ир. Ай, Алла! Ҡысҡырырға ярамай, ишетәләр!

Ҡ а т ы н. Булмаһа, уратып әйтегеҙ.

Ир. Һеңлем, минең ғаилә бар. Бала ас, бисә яланғас.

Ҡ а т ы н.. Һеҙгә лә штраф һалдылармы?

И р. Юҡ! Малай компьютер һорай, бисә – шуба. Норковый.

Ҡ а т ы н. Бала менән ҡатындың күңелен күреү сауаплы, тиҙәр.

И р. Күрер инем дә, аҡса ҡайҙа? Аҡса ҡайҙа, тием?

Ҡ а т ы н. Зарплата алмайһығыҙмы ни?

И р. Ул бит сүп! Икмәк алырға ла етмәй.

Ҡ а т ы н. Тимәк аҡсағыҙҙы дөрөҫ бүлмәйһегеҙ! Күпме алаһығыҙ?

И р. Күпме алһам да етмәй. Тағы кәрәк.

Ҡ а т ы н. Һеҙгә тағы бер ергә эшкә урынлашырға кәрәк. Хәҙер күп кеше ике урында эшләй.

И р. Кәрәкмәй миңә икенсе эш! Миңә өҫтәмә аҡса кәрәк. Өҫтәмә! Аңлайһыңмы?

Ҡ а т ы н. Ҡатынығыҙ ҡайҙа эшләй?

И р. Эшләмәй.

Ҡ а т ы н. Бәй! Ана шуға ла аҡсағыҙ етмәй. Эшкә урынлаштырығыҙ.

И р. Кәрәкмәй уға эш! Миңә аҡса ғына кәрәк. Аҡса! Күп аҡса! Ошолай өҫтән яуып торһон. Ямғыр кеүек! Был кеҫәгә! Был кеҫәгә!

Ҡ а т ы н. Бурысҡамы?

И р. Ай, Алла! Һин үлтерәһең мине! Бөтөнләйгә!

Ҡ а т ы н. Нисек бөтөнләйгә? Мин аңламайым һеҙҙе! Икенсе эшкә урынлашырға теләмәйһегеҙ, бисәгеҙҙе эшләтмәйһегеҙ. Үҙегеҙгә күп аҡса кәрәк. Һеҙгә урлашырға кәрәк!

И р. Уй, йөрәк! Кәрәкмәй урлашырға, кәрәкмәй. Миңә ришүәт кәрәк, взятка! Взятка! Взятка!!!

Ҡ а т ы н. Аңланым. Рәхим итегеҙ. Хәҙер рөхсәт буламы?

И р. Була. Мә!

Ҡ а т ы н. Рәхмәт.

Фото: culture.ru