Мостай Кәримдең повесы буйынса «Ярлыҡау» хәрби драмаһы Рәсәй прокатына сыға

Сюжет үҙәгендә — 20 йәшлек сержант-танкист Любомир Зухтың тарихы, ул яҙмыш ҡушыуы буйынса төпкөл ауылға килеп эләккән испан коммунистарының ҡыҙы Мария-Терезаға ғашиҡ. Ҡыҙ ҙа уны ярата. Частә «отбой» командаһы яңғырағас та, сержант һөйгәне янына ашыға. Ләкин ул һуғыш осоро ҡануны буйынса енәйәт ҡылғанын аңламай, ә бының өсөн юғары яза бирелергә тейеш.

Режиссер Айнур Асҡаров һүҙҙәренсә, «фильмдың төп ваҡиғаһы — йәш һалдат Любомир Зухтың дезертирлығы. Драматургия контрапунктта төҙөлә. Бер яҡтан — мөхәббәткә сарсау, икенсенән — һуғыш. Беҙ һуғыштағы йәшлек, хис-тойғолар һәм бурыс, өлкәнәйеү, әхлаҡ һәм закон бәрелеше хаҡында бәйән итәбеҙ».

Фильмдың продюсерҙары – Мостай Кәримдең повесы буйынса «Һеңлекәш» блокбастерын төшөргән Тимербулат Кәримов, Михаил Курбатов һәм Дмитрий Фикс.

Картинаның режиссеры – Айнур Асҡаров («Өс таған», «Буран», «Өфөнән һөйөү менән»). Фильмдың сценарий авторы – Айҙар Аҡманов («Һеңлекәш», «Өс таған»).

Һуғыштағы дуҫтарҙың төп ролдәрен Александр Новиков («Пищеблок», «Жиза»), Николай Ғәлләмов («Сердце Пармы», «Сама дура»), Евгений Михеев («Летчик», «Вампиры средней полосы») башҡара. Любомир Зухтың һөйгән ҡыҙын йәш актриса-дебютант Йәмилә Мөҙәрисова уйнай. Фильмда шулай уҡ тәжрибәле артистар Гела Месхи («1941. Крылья над Берлином», «Летчик»), Юрий Лопарев («Завод», «Калашников»), Александр Бухаров («Ржев», «Лев Яшин. Вратарь моей мечты») һәм Любовь Зайцева («Живой», «Точка») ҡатнаша.

Оператор – Андрей Макаров («Небо в алмазах», «Реальная сказка», «Елки 2»). Ҡуйыусы рәссам – Вячеслав Виданов («Һеңлекәш», «Личная жизнь королевы», «Женщин обижать не рекомендуется», «Берёзка»).

Костюмдар буйынса рәссамдар – Яна Боуден («Һеңлекәш», «Все началось в Харбине», «Восьмидесятые»), Ирина Гришан («Чернобыль», «Невезучая», «Привет от Катюши»).

Дистрибьютор булып «Наше кино» компанияһы сығыш яһай.

https://www.bashinform.ru/news/culture/2023-03-30/v-rossiyskiy-prokat-vyydet-voennaya-drama-pomilovanie-po-povesti-mustaya-karima-3198181