Хужабикәләргә - рецептар

Ҡарағаттан  «5 минутлыҡ» ҡайнатмаһы

3 стакан һыуға 7 стакан шәкәр һалып, утҡа ҡуйырға. Был масса ҡайнап сығыу менән 11 стакан ҡара ҡарағат һалып, 5 – 7 минут ҡай­натырға.
Унан тағы 7 стакан шәкәр өҫтәп, иҙелеп бөткәнсе болғатырға. Желе һымаҡ ҡуйы ҡайнатма килеп сыға.

Ҡышҡылыҡҡа еләктән десерт

3 кг еләк, 1 банка ҡуйыртылған һөт кәрәк.
Еләктәрҙе таҙартып йыуырға. 2 кг еләкте турарға, контейнерҙарға һалырға. 1 кг еләкте блендер менән үткәреп, ҡуйыртылған һөт менән яҡшылап болғатырға.
Килеп сыҡҡан коктейлде  контей­нер­ҙағы еләктәрҙең өҫтөнә ҡойоп сығырға. Әҙерәк кенә болғатырға була. Һыуытҡысҡа туңдырырға ул­тыртырға.

Крыжовник ҡайнатмаһы

Крыжовникка банан, грек сәт­ләүеге ҡушып ҡайнатһаң, бигерәк тәмле була. Шәкәр 1:1 нисбәтендә, емештәр һәм сәтләүек сама менән алына. Бананды турарға, сәтләүекте полиэтилен ҡапсыҡҡа һалып, өҫ­төнән уҡлау менән тәгәрәтеп ваҡ­ларға. Йыуып әҙерләнгән крыжовникты ҡушып, өс тапҡыр бишәр минут  ҡайнатып алырға.

Сейә ҡайнатмаһы

Һауытҡа ярты литр һыу, ярты литрлы банка менән шәкәр һалып, ҡайнатып сығарырға һәм шундай уҡ банка менән сейә өҫтәп ҡайнатып сығарырға. Һуңынан тағы ошо уҡ кү­ләмдә шәкәр, сейә һалып ҡайна­тырға. Шулай өс тапҡыр аралаш­тырырға. 5 минут ҡайнатырға ла һүндерергә.

Абрикостан ҡайнатма

Ҡайнатма өсөн тығыҙ, бешер-бешмәҫ абрикостарҙы алырға, йом­шаҡтары бармай, иҙеләсәк. Абри­костың эсендәге төшөн алып, дүрт өлөшкә бүлергә.
1 кг шәкәргә бер бокал һыу һалып, яҡшылап сироп ҡайнатырға һәм шул сиропҡа 1 кг абрикосты, бер телем генә лимон киҫәге һалып, саҡ ҡына болғатырға ла, һүндереп, һыуытырға ҡуйырға. Һыуынғас яңынан 5 минут ҡайнатып, һүндерергә. Шулай дүрт тапҡыр һыуыта-һыуыта ҡайнатып алырға. Күбеген алырға онотмағыҙ. Һуңғы тапҡыр ҡайнатҡанда утта оҙағыраҡ, сама менән 10-15 минут тоторға кәрәк. Һыуынғас банкаларға тултырырға. Бик тәмле килеп сыға, абрикос­тары иҙелмәй, ҡайнатма ҡуйы була.

Еләктән желе

1 кг еләкте йыуырға ла, 1 кг шәкәр һалып, болғатып, һуты бүленеп, шәкәре иҙелгәнгә тиклем ситкә  ултыртып торорға. Һуңынан блендер менән иҙергә лә һүрән утта ун минут ҡайнатырға. Ярты стакан «Агар-агар» һалып болғатырға. Желены һыуытҡыста һаҡларға.

Ҡыҙыл ҡарағаттан желе

1 кг ҡыҙыл ҡарағат, 1 кг шәкәр кәрәк.
Ҡарағатты йыуып, өҫтөнә бер кг шәкәр һалып, һуты сыҡҡансы яҡ­шылап иҙергә. Һуңынан 8 – 10 минут шәкәр менән ҡайнатырға ла, дур­шлагҡа һалып иҙгәс, банкаларға тултырырға.

Ҡурай еләгенән джем

9 стакан (200 г) шәкәргә ярты стакан һыу һалып, ҡайнатып сығарырға. Шуға 14 стакан еләк һалырға. Һүрән утта 15 минут ҡайнатырға. Шул ҡайнар массаға һуңынан тағы 9 стакан шәкәр һалып, эреп бөткәнсе болғатырға. 5 сәғәткә ситкә алып ҡуйырға, болғап торорға. Ҡайнат­маны һалҡында тоторға. Бик тәмле желе килеп сыға.
 
Сливанан джем

1 кг слива, 800 г шәкәр кәрәк.
Сливаны йыуырға һәм һәр бере­һенең ситен бысаҡ менән ҡырҡырға. Төшөн алғандан һуң блендер менән иҙергә һәм шәкәр ҡушып, кәстрүлгә һалырға. Ошо масса талғын утта 40 минут самаһы ҡайнатыла. Йәғни джем ҡуйырырға тейеш. Әҙерләгән ваҡытта сыҡҡан күбекте йыйып торорға онотмағыҙ.
Әҙер джемдың төҫө бик матур була. Уны банкаларға эҫе килеш һалалар һәм стерилләйҙәр.

Фото: ferma-alpatevo.ru